Ioh u Kapten ka kynhun ialehkai Cricket ka Meghalaya ia ka 3rd Position ha ka HSSLC Commerce

Shillong, Jymmang 05: U nongialehkai Cricket ka jylla uba dei ruh u Kapten jong ka Meghalaya ha ka U-19 u Dipankar Barua ula ioh iaka kyrdan kaba lai ne Third Position ha ka Higher Secondary School Leaving Certificate (HSSLC) Commerce kaba la pynbna hynne ka sngi Nyngkong da ka Meghalaya Board of School Education (MBoSE).

U Dipankar udei uba la bat mynta la 2 snem kum u Kapten jong ka kynhun ialehkai ka Meghalaya ha ka Cricket bad u dei ruh u Wicket Keeper/ Batsman bad ula leit ban ialehkai ha kylleng ki jylla ban mihkhmat ia ka Meghalaya hynrei watla ym shim la ioh por bha kum kiwei pat ki khynnah ban pynkhreh ia ka jingpule ka jongu, hynrei da ka jingtrei shitom bad minot thop ula ioh ia ka kyrdan ka balai ha ka HSSLC Commerce.

“Ngam shim la iohlad bha ban pynkhreh ialade na ka bynta ka eksamin bad ha u snem ba la dep ngam shym la ioh ban leit skul 3 bnai ha Laban Bengalee Boys Higher Secdondary School namar ba nga leit ialehkai Cricket ha kylleng ki jylla ban mihkhmat ia ka Meghalaya” ong u Dipankar.

“Hadien ba nga lah wanphai nga la ioh ban pynkhreh ia ka eksam ban ioh ia ka percentage kaba biang ba ngan ioh bteng ia ka jingpule ha kano kano ka college kaba nga don jingthmu ban leit pule, ka jingioh iaka Third Position kadei kaei kaei kaba la pynkyndit shisha ia nga” la ong u Kapten ka Meghalaya.

Ula ong, ba watla ula ioh ia ka 3RD Position bad yn leit ban pule ia ka BBA hynrei ka thong bad ka jingangnud ka jongu hi kadei ban kylla long kum u Nongialehkai Cricket uba tbit bha bad ka jingpule ia u kan long tang kum ka jingkyrshan ha ka jingim.

Haba kylli kumno u pynkhreh ialade na ka bynta kane ka eksam bad kumjuh ruh ban pyllait por ha ka jingialehkai ia ka Cricket, u Dipankar ula ong “Ka long kaba eh shibun ia nga, ba ngan pynleit jingmut ha ka jingialehkai Cricket bad kumjuh ruh ha ka jingpule. Ha u snem ba la dep ngam shim la ioh ban leit sha skul ne wat ban pule ruh kumba 3 bnai namar ba nga la leit ialehkai ha kylleng ki jylla ban mihkhmat ia ka Meghalaya. Haba nga lah thait namar ba nga lah ialehkai ngam don bor shuh ba ngan pule ruh hynrei dei tad ynda nga lah wanphai nga lah sdang pat ban pule bad nga la pule haduh 4-6 kynta ban ioh ia ka percentage kaba bha, hynrei kaei kaba la iarap bha ia nga kadei na ki nonghikai bad ki paralok kiba la ai mysniem bad pynshlur ia nga ba ngan pynleit jingmut bha ha ka jingpule bad kila ai mynsiem ia nga ba nga dei u khynnah uba lah ban leh bha shuh shuh ha ka jingpule”.

Na ka liang u Honorary Secretary jong ka Meghalaya Cricket Association u Bah Rayonald Kharkami ula ai khublei kyrpang ia u Kapten jongka kynhun ialehkai Cricket ka Meghalaya U-19 u Dipankar Barua halor ka jingioh ioh ia ka 3rd Position ha ka HSSLC Commerce kaba la pynbna da ka MBoSE.

U Bah Kharkamni ula ong, ba ka jingtrei shitom bad ka jingminot thop u Dipankar kala pynlong ia u ban ioh kheit ia u soh ka jingjop bad kadei ruh ka nuksa kaba bha bad ka jingai mysniem ia kiwei ruh ki nongialehkai kiba dang khynnah ha ka jylla ba nalor ka kam ialehkai ka jongki kin pynleit jingmut ruh ha ka pule puthi.