Shillong, Jymmang 02 : U Myntri ka Tnad Pule Puthi Rakkam A Sangma ha ka sngi Thohdieng, ula hiar jurip ia ki kam ba damg pyntrei shaid shaid jong ka Captain Williamson Sangma State University hapoh ka campus jong ka university ha Balalgre.
Ia u Myntri la synran da u MLA ka Rangsakona Subir Marak bad u Nongaibuit ka Tnad Pule Puthi Bah Himalaya M Shangpliang.
Ha kane ka jingjurip, u Myntri ula shongbishar kam halor ka jingiaid ki kam bala pyntrei hapoh ka campus, ha ka jingiadonlang ki Ophisar na ka Tnad Pule Puthi bad ki engineer bad ophisar na ka tnad PHE, PWD (R&B), Power bad BSNL.
Ka jingtei jong ka Tnad PHE kin dang ban sdang :
Ka pukri um ha ryngkat ka treatment plant bad kiwei kiwei ki jingtei ba iadon bynta, la khmih lynti ban pyndep hapoh ka shisnem. Ia mynta shipor, ka tnad ka dang wad ia ki lad ban pynpoi um sha ka campus. U Executive Engineer u dang khmih bniah ia ka shyngiarkaba don hapoh ka phyllaw, bad bthah ruh ban pynkhreh ia ka mang tyngka kham kloi kat kaba lah. Iaka jingpynpoi um ba shipor la khmih lynti ban pyndep noh hapoh kaarbnai, hashuwa ban sdang ka jinglong klas ha u bnai Nailar 2025.
Dang pyndonkam da u generator ban pynmeh bording ha campus :
Watla ka Sorkar kala dep pyllait ia ka pisa ba T.44 lak ban tan bording elektrik, ka Tnad kan dang ban sdang pyn trei ia ka kam. Ki Ophisar ka Tnad kila kular ba ia ka jingtan bording yn sa pyndep noh hapoh ka shibnai hadien ba iohpdiang ia ka pisa bala mang. U Myntri ula bthah ia ka Tnad ba kan leh wut wut ia ki kam. La khmih lynti ba ka lah ban don ka jingkiew ka jinglut jingsep haduh 5% namar ka jingslem ban pyntrei ia ka kam.
La dep pyntrei ia ka kynroh jong ka jaka ba 90 bighas :
Hynrei sa kumba 50-60 bigha ka jaka ka dang don shabar jong ka kynroh. Haba pynshong nongim ia ka jingdon kam ka University la ka long ia ka kynroh ba shipor ne ba shirta, ka Tnad kan sa ai ia ka jingmang tyngka kaba dei. Nalor kata, ka jingmang pisa na ka bynta ban shna ia ki surok hapoh ka campus ruh yn sa pynkhreh noh shaid shaid.
Dang sahteng ka BSNL ban pynpoi ia ki fibre :
U Ophisar ka BSNL u pyntip ba ia mynta ka jingsiang ia u fible shapoh khyndew kala poi haduh ha Garobadha. Kiwei pat ki jingdonkam kumki routers, hotspots, firewall bad ki kor cybersecurity yn sa pyndap noh. Baroh ki kam la khmih lynti ban pyndep hapoh ka shibnai hadien bala pyllait ia ka pisa bala mang.
Naba ia ka jaka la thied nyngkong eh na ka bynta ban seng ia ka Medical College bad namar ka jingiaid jong ka por, kila don ki jingbym biang ha ki kot ki sla. La bynshet ia u Additional Deputy Commissioner (ADC) ka West Garo Hills ban pynshisha bad pynthymmai ia ki kot ki sla. U MLA ka thain ula shimkhia bha ban pynsted ia ka sorjamin da ka jingiarap ki trai shnong kiba la ai jaka. Ka sorjamin ka iathuh b aka jaka baroh lang kaba hap hapoh ka university ka long haduh 285 bighas.
U Registrar ka University ula pyntip ba ka building jong ka College of Architechture bad Urban Planning kala dep ha ka jingpyntrei hynrei ym pat shym la pyndonkam satia ia mynta. Namar ka jingsahteng ka jingmynjur ba hap ioh na Council of Architecture bad AICTE, la buh ia ka jingkyrpad ba ia kane ka building yn pyndonkam shuwa shipor da ka University kum ka Science Block, kaba la thmu ban pyntreikam noh naduh u snem ban wan.
U Nongaibuit ka Sorkar Jylla Bah Himalaya M Shangpliang ula ai jingmut ban thaw noh da ka Coordination Com mittee ka ban khlieh da u D.D Sangma, Secretary ka Tnad Pule Puthi ka Sorkar, ka ban pynthikna ia ka jingiaid beit ki kam ki jam jong kane ka University. La tyrwa ba ki dkhot kin kynthup ia ki Deputy Commissioner ka West Garo Hills bad South West Garo Hills lem bad ki nongmihkhmat na ka tnad PWD (R&B), PHE, Power bad BSNL.
