Shillong, Iaiong 29 : Ka Iingkashari Meghalaya High Court kala pan ia ka kaiphod jinglong jingman ba bniah khamtam halor ka jinglap ia u dewiong bala tih tam ha East Jaintia Hills District.
Kane ka la mih hadien ba ka 28th Interim report ka Committee u Justice (Retd) BP Katakey kala pynpaw ia ka jingshem ia bun bah u dewiong ba khlem pat lum jingkhein, uba don shabar ka depot jong ka Coal India Limited (CIL), uba don haduh 1,92,840 ton ha kaba haduh 1,80,299.48 ton la shem tang ha East Jaintia Hills.
“Halor kane, ai ia ka copy jong ka Interim report sha ki bor ka Sorkar Jylla ha ryngkat ka jingbthah ba ki dei ban aiti ia ka kaiphod jinglong jingman ba bniah, khamtam halor ka jingshem ka Garuda UAC ia u dewiong bala tih tam ha East Jaintia Hills” ong ka Iingkashari ba kynthup ia u Justice HS Thangkhiew bad Justice W Diengdoh ha ka hkum bala pynmih ha ka 28 tarik Iaiong.
Haba iadei bad ka jingdon u dewiong bala tih beain bala kurup hapoh ka MMDR Act bad ka jingshem ia ka jingdon u dewiong ba tih beain, ia ka kaiphod lah dei ban ai sha ka Iingkashari.
Ka Iingkashari kala shimkhia ba ka MBDA (Meghalaya Development Basin Development Authority), kaba la shah bynshet ia ka kam ban batai ia ka map bala ring dur na suin bad ban khein ia ka jingdon u dewiong ha ki katto katne ki jaka ka South West Khasi Hills, bad lada donkamban shim ia ka jingiarap jong ka North East Space Application Centre, kam shym la leh satia ia ka kam.
Haba sot ia ka kaiphod, kala ong ba ka MBDA kam shym la shimkhia satia ban wan leit sha ka jingialang ba la pynlong da ka Committee lane kala shim ia kano kano ka sienjam ba batai ia ka aerial surbvey map ha ki 6 tylli ki shnong ha South West Khasi Hills, lane shna ia kano kano ka kaiphod halor kane ka kam.
Nalor kane, ka Iingkashari kala ong ba ka bynta kaba lai kaba donkam ban hap shimkhia kyrkieh ka dei ka jingai ia ka Mining Transport Challan (MTC) da ka Directorate of Mineral Resources, ha kaba artylli ki khep la ioh ban kem ba ka jingai ia ka MTC ka long kaba pynkhein ia ka clause 10 (c) jong ka Revised Comprehensive Plan, 2022, namar ia ka kyrteng bad jaka sah jong u trai bad u nongniah jong ka kali lem bad ki mobile number ym shym la pynpaw satia nalor ka jingshisha ba ki kali bala talasi ki don ia ka MTC bala ai sha ki kali kiba don da uwei pat u nombor.
Halor ka jingkyrpad u AG ban ban pynsted ia kane ka kam hapoh ka Iingkashari bala buh kyrpang ban bishar ia u dewiong bala kurup hapoh ka kyndon 21 jong ka MMDA Act, ka Iingkasharikala hukum ban leh ia kata bad la khmih lynti ba kane ka Iingkashari ba kyrpang kan pyndep noh kham kloi ia ka jingbishar.
“Haba iadei bad kiwei pat ki kam hashuwa ban pynmih ia kano kano ka hukum, ai ba kin aiti ia ka kaiphod jinglong jingman ba thymmai hapoh ka 4 taiew” kala ong.
