Nongstoiñ, Ïaiong 25: U District AIDS Control Officer ka West Khasi Hills Dr R Basaiawmoit, ula pyntip ba na ki 216 ngut ki nongpang AIDS ha West Khasi Hills, tang 127 ngut ki dei kiba tista ban shim dawai.
Ia kane ula pynpaw haba kren ha ka Advocacy cum Sensitization Programme bala pynlong da ka District Legal Services Authority (DLSA) West Khasi Hills, ryngkat ka jingïatreilang bad ka Meghalaya AIDS Control Society (MACS), ha ka sngi palei ha Conference Hall jong ka District bad Sessions Judge, Nongstoiñ.
U Dr. R. Basaïawmoit u la batai bniah halor ka jingïapher, ka jingpur bad ki lad ban ïada na ka jingpang HIV, da kaba ong ba watla ym pat don dawai ban pynkhiah pura, hynrei ïa ka HIV lah ban ïada bad ai dawai lada lap ha ka por kaba biang.
U la pynpaw ba ha kane ka district, 216 ngut ki briew ki la shah ktah ha ka HIV, bad 127 ngut ki dei kiba tista bha ban shim bad dih dawai. U la kyntu ïa ki paidbah ba kin weng ïa ka jingsheptieng bad ka jingsngew lehraiñ bad ban wan shakhmat ban leit test, khnang ban lap biang por lada jia ba ki don ïa kane ka jait jingpang ha ka met ka jong ki.
U Deputy Director (Mainstreaming), MACS Shillong Bah A. Lanong u la kren halor ka jingdonkam ban ai jingkyrshan bad ka jingsngewlem sha kito kiba im bad ka HIV. U la kyntu ba ym dei ban leh shiliang ne kynnoh sniew ïa ki briew kiba shah ktah. U la ong ba ka jylla Meghalaya ka don ha ka kyrdan ba ar ha ri India ha kaba ïadei bad ki jingpang STD (Sexually Transmitted Diseases).
U la kren shaphang ka HIV and AIDS (Prevention and Control) Act, 2017, ka aiñ ka khang pyrshah ïa ka jingbym ai kam, jingbym ai pule, jingñiew shilliang khmat wat ha ki jaka ai jingsumar. Ka aiñ ka khang ruh ïa ka jingpynpaw kyrteng khlem jingbit bad ka dawa ïa ka jingpynshai da ka mon sngewbha ha kaba ïadei bad ka test bad jingsumar.
Ka Kong E.G. Kharbani, Deputy Legal Aid Defense Counsel, ka la ai jingpynshai halor ki hok aiñ kiba ïadei bad ki briew kiba im ryngkat bad une u khñiang jingpang PLHIVs (People Living with HIV), MARPs (Most At-Risk Populations) bad ki CABA (Children Affected by AIDS), da kaba kdew ïa ka jingdonkam ban tip ïa ka hok ha kaba ïadei bad ki aiñ ban pynneh ïa ka burom
Ïa kane ka programme la pynïaid da ka Kong D.M.K.S. Shadap, Chief Judicial Magistrate-cum-Secretary, DLSA Nongstoiñ bad kiba la ai jingkren ki kynthup ia ka Kong F.C. Rymbai Chief Legal Aid Defense Counsel bad kiwei kiwei.
