Guwahati, Iaiong 25: Ki pulit ka jylla Assam kila kem sa hynriew ngut ki briew na kylleng ki district jong ka jylla, halor ka jingkynnoh ba ki ïada ne pynphriang ïa ka nongrim jong ka Pakistan ha ki social media hadien ka jinghiar thma ba dang shen ha Pahalgam, Jammu bad Kashmir, kaba la shim ïa ka jingim jong ki 26 ngut ki tourist.
Ia kine kiba la shah kem la tip kyrteng kum u Md. Jabir Hussain na Hailakandi, u Md. A.K. Bahauddin bad Md. Javed Mazumdar na Silchar, u Md. Mahahar Mia uba ju khot sin kum u Md. Mujihirul Islam na Morigaon, u Md. Aminul Islam na Nagaon, bad u Md. Sahil Ali na Sivasagar.
Kane ka jingshah kem ka long kum shi bynta ban lap ia ki briew kiba pynpaw ka jingsngewlem ne ka jingkyrshan ia ka Pakistan ha kaba iadei bad ka jingshah hiar thma.
Haba thoh ha ka X u Myntri Rangbah ka Assam u Himanta Biswa Sarma u la ong, “Ka Assam kan ym lah ban shah iano iano la ki long directly ne indirectly, kiba kyrshan ne iada ia ka Pakistan ha kaba iadei bad ka jingshah hiar thma ha Pahalgam”.
