Shillong, Iaiong 25 : U Symbud Myntri Rangbah ka Jylla ba khmih ia ka kam Pohiing (Police) Bah Prestone Tynsong ha ka sngi Thohdieng u la kular ban pynbiang ia ka jingpahara kaba paka hapoh ka jaka pule jong ka North Eastern Hill University (NEHU) hadien ka jingjia shah thombor uwei u nonghikai.
Haba kren sha ki nongthoh khubor, u Bah Prestone ula ong ba ka Ain kan shim iala ka jong ka lynti pyrshah ia kito kiba donkti ban shoh ia u Assistant Professor jong ka Tnad Hindi ha NEHU.
“Nga la dep bthah ia u Superintendent of Police (SP) bad ki nongpyntrei ia ka ain ba kin pynthikna ia ka jingshngain bad ka jingiada bad ba ka campus baroh kawei jong ka NEHU kan long kaba shngain” ula ong.
Haba kylli ia ki jaid jingiada ki ban shim, u Bah Prestone ula ong “Balei ngan iathuh ia phi? Nga la ong ia phi ba ngi la dep ban ai biang ia ki bor pahara. Kumta, ngam donkam ban batai bniah ia ka namar ka dei ka kamram jong ka Sorkar ban pynthikna ia ka jingshngain jong baroh-la ki dei ki samla pule, la ka dei ki nonghikai ne dei mano manor uh”.
Haba kyntu ia baroh ba kim dei ban khuslai, u Symbud Myntri Rangbah ula ong “Sngewbha wat don ia kano kano ka jing sheptieng naba ia mynta na ka Sorkar, ngi la dep pynkhlain ia ki bor pahara bad ngin pynthikna ba baroh kin long kiba shngain kito kiba sah ne kiba leit sha phyllaw ka NEHU”.
Une u Nonghikai ba kyrteng u Alok Singh ula ujor ia ka ejahar pyrshah ia u President ka NEHUSU Sandy Sohtun bad san ngut kiwei pat halor ka jingkynnoh ba ki shoh ia u hapoh ka Ophis treikam ha ka janmiet 24 tarik Iaiong.
