Shillong, Iaiong 23: Ki 22 ngut ki khynnah pule kiba la ioh bih na ka jingbam hapoh Mandya, Karnataka, hynne ka sngi Balang, kila wanpoi ha nongbah Shillong bad na ka liang u Myntri ka tnad Social Welfare Bah Paul Lyngdoh ula pynthikna ba baroh kitei ki khynnah kin sa ioh ban leit skul noh ha ki skul sorkar.
Haba pdiang ia ka jingwanphai noh jong kine ki khynnah pule ha ka jingialang kaba la long ha ka ophis treikam jong ka Directorate of Social Welfare, u Bah Paul Lyngdoh ula ong ba kane kadei ka jingtrei shitom jong ka tnad, u Director bad ki ophisar, ha kaba kitei baroh lai kila synran ia kitei ki khynnah naduh na Karnataka.
“Ha ka jingleit sah ka jong ki ha Karnataka, kila pynbit pynbiang ban pynthikna ba kiei kiei baroh kin long kiba iaid beit iaid ryntih bad kin long ruh kiba iaid katkum ki kyndon ain.
Hadien ba la pyndep ia ki kam ki jam kiba iadei bad ka ain ka kanun, ka kynhun na Karnataka kaba la ialam da ka nongialam jongka Child and Women Rights Commission kila mynjur ban synran bad ban wan ialam noh ia kine ki khynnah sha Shillong mynta ka sngi” la ong u Bah Paul.
Ula pyntip ba kala don ka jingiakren hapdeng ki kmie ki kpa jong kine ki khynnah bad ki arngut ki heh ophisar kiba mihkhmat ia ka tnad pule puthi khnang ba ka rukom pynkhreh bad ban pynbiang ia ki jaka pule ki jongki nangne shakhmat.
“Mynta kila iehnoh shiteng ia ka jingpule ka jongki, ka tnad pule puthi kala pynthikna ia ngi ba kan donkam 2-3 sngi ban pyndep ia baroh ki jingdonkam bad hadien kane, kin pynthikna ba kine ki khynnah kin ioh ban leit pule ha ki skul kiba la pyniaid da ka sorkar kiba don ha ki jaka, kaba jan bad ka jaka sah ka jongki” ula pynthikna.
Ula ong, “Mynta ha ki katto katne ki jingjia ki kmie ki kpa ruh kidei kiba leit trei na kawei ka jaka sha kawei pat bad ha kum kine ki jingjia, ngin sa shim ia ka jaka sah kaba thikna ka jongki ban pynthikna ban pynrung ha ki skul kiba don marjan bad haba ki leit sah noh sha kiwei pat ki jaka ruh ki donkam ban ai jingpyntip lypa ia ngi khnang ba ngin shimkhia ia ka jingleit pule ka jongki haba ki leit ban sah na kawei ka jaka sha kawei pat”.
Ula pyntip ruh ba ka sorkar kam don bynta eiei ha kaban phah leit skul ia kine ki khynnah sha Karnataka.
“Ki kmie ki kpa haba kila rai ban phah ia ki khun jongki sha Karnataka, kila leh ia katei lyngba kawei ka sengbhalang kaba na Jowai, West Jaintia Hills District bad ka jingiakren kala sdang hapdeng ki nongialam jong katei ka sengbhalang bad ki kmie ki kpa bad kam don bynta eiei bad ka sorkar. Kim shym la pan ia kano kano ka jingiarap na ka sorkar, ne ban pan jingmut ruh, hynrei kadei tang hadien ba kala mih ka jingjia kaba sngewsih ha kaba la don ka jingioh bih ha ka bam, kaba ngi lah duh noh ia ki arngut napdeng ka jongki bad hadien katei kila pyntip sha ka sorkar jylla” ula ong.
“Haba biang ka jingling jingman, ka jingai jingmut ka jong ngi ka long ha kum kitei ki jingjia, kino kino ki khynnah kiba donkam ban leit pule shabar, kidei ban wad ia ka jingbtin lynti bad ia ka jingiarap na ka sorkar Meghalaya bad ha kaba iadei bad ka pule puthi hapoh ka jylla, ngi la shah pynkup bor ba ngi dei ban pynthikna ba baroh ki khynnah kin ioh ia ki jaka pule naduh ka 6 snem ka rta haduh 14 snem ka rta katkum ka RTE, Act 2013” la ong u Myntri Sorkar.
