Nongstoiñ, Nailur 1: Ka ophis jong u Block Development Officer ka Nongstoiñ C&RD Block ha ka sngi palei ka la leit ban thaw haduh11 tylli ki Self Help Group (SHG) hapoh ka shnong Mawlaisyiem, kaba dei ka jaka khappud hapdeng ka jylla Meghalaya bad Assam ban kyntiew ia ka ioh ka kot jong ki longkmie kane ka thain.
Ia kine ki SHG la leit ban thaw da u Cluster Coordinator u Bah C.C Diengngan ha ka jingialang ha Mailaisyiem ha ka jingia donlang ki Nongialam Shnong, ki riew rangbah bad ki Nongtrei na ka Ophis ka Block.
Ki SHG ki la pynpaw ba ka jingthaw ïa kine ki kynhun, ki buh jingkyrmen ba kin nang lah ban kyntiew ïa ka rukom im jong ki ha ki nongkyndong khamtam ban kyntiew ïa ka rep ka riang, namar ba baroh ki nongshong shnong ha katei ka dong ka thaiñ ki ju im tang lyngba ka rep ka riang bad ka ri jingri.
La ïathuh ruh ba na ka liang u Cluster Coordinator u bah C.C Diengngan, u la pynshlur ïa ki longkmie ba kin mih shakhmat, ban long ki nongkitkam bad ki dkhot ha ki SHG. Namar na ka liang jong ka sorkar ruh ka don ïa ka thong ban ïarap bad ban kyntiew ïa ka rukom im ki longkmie ha ki nongkyndong lyngba kitei ki SHG.
Une u Cluster Coordinator ula pyntip ruh ba ka Ophis kan khmih ia ka jingtreikam jong ki SHG haba ong “Lada ki treikam bha, ka Block kan sa pynshna ruh ia ka ophis jong ka Village Organization (VO) ïa ka ba ki SHG ki lah ban pyndonkam ha kano kano ka por ba donkam. Na ka liang ka ophis kan sa pynïoh ruh ïa ka jingïarap sha kitei ki kynhun ba kin pyntyllun shakhmat ïa ka kam jong ki”.
