Dawa pynsangeh ka CoMSO ban thungkam ia ka samla ba pass MCS ba suba bym dei ka thei Garo

Shillong, Iaiong 21 : Ka Confederation of Meghalaya Social Organisation (CoMSO) ha ka sngi Nyngkong, kala dawa ban pynsangeh shuwa shipor ia ka jingthungkam ia ka Esther Ngurlienmoi Marak, kaba la shah jied na ka bhah Scheduled Tribe ki Garo ha ka eksam Meghalaya Civil Services (MCS), tad haduh ban da dep pynshisha bha ba ka dei hok ka Garo.

Ha ka kyrwoh, ka CoMSO kala dawa ruh ban thung ia ka State-level Independent Enquiry Committee, kaba kynthup ia ki Nokma ba ki Nongialam ki Mahari, ki nongmihkhmat na ka Autonomous District Council (ADC), ki scholar ba tip bniah ia ki riti dustur ki riewlum, bad ka Tnad Tribal Affairs ka Jylla, ba kan shong bishar ia kane bad ia kiwei kiwei ki case kiba iasyriem bad kane.

Ka Confederation kala kynnoh ba ka Estheer Marak kala shah jied wat hapdeng ka jingbym lah bha ban pynthikna ba ka hiar pateng na ka kmie Garo, kaba ithuh da ka Mahari (Kur), lane balah ban pynshisha ia ka tynrai Garo.

Kala kam ruh ba lyngba ka RTA na ka Ophis ka Deputy Commissioner, East Khasi Hills (vide Letter No. P.15/1/26/09/Vol-I/82, dated 20th Lber 2025), la pynthikna ba ym shym lap satia ia ki kot ki sla ba la ai Scheduled Tribe Certificate ia ka Esther Ngurlienmoi Marak.

“Kane ka jingbym biang ki kot ki sla kala pynmih ia ka jingkylli halor ka jingpyniaid kam kaba shai, ka bynta jong ka jingbishar ia ki kot ki sla da ki borkhmih, bad lehse ka jingleh bym hok ha ka jingai syrnot bad thungkam. Ka CoMSO ka khein ia kane ym tang ka jingpynkhein ia ka jingshaniah hynrei ka jingpynkhein ia ka jingngeit bala ai da ki paidbah ha ki Tnad treikam ka Sorkar ka Jylla Meghalaya. Lada ia ka snap ithuh ki riewlum ba shu thok la ailad khlem da tynjuh, ka lawei jongka Reservation Policy, ka jingshaniah u paidbah, bad ka synshar khadar nala tynrai ka don hapdeng ka jingma kaba khraw bha”kala bynrap.

Ha kajuh ka por, ka CoMSO kala dawa ruh ban pynthikna ia ka syrnot riewlum kaba mih dak jingkylli, kynthup ban pyn shai paidbah ba kumno la ai ia ka syrnot, mano ba aibor ia ka bad balei ba jah ki kot ki sla.

“Ngi dawa ia ka jingpynbah khlieh bad leh eiei da ka Tnad pyrshah ia ki Ophisar kiba donkti ha kane ka kam ai syrnit kaba beain, la ka dei kaba leh da ka jingtorti lane ba leh khnang” kala bynrap.

“(Ka dei ban don) ka jingbishar bad audit ia ki tribal certificate ha baroh kawei ka Jylla, kiba la dep ai naduh ki phew snem bala leit ia ki nongtrei Sorkar, ka jingpynrung klas ha ki jaka pule bad kiwei kiwei ki jingmyntoi bala ai na ka bhah ki ST, haba buhkhmat ia ka jingpynshisha ryngkat bad ki borkhmih na ki Kur bad ki Shnong ki thaw” kala ong.

Ka CoMSO kala maham ruh “Lada ka Sorkar Meghalaya kam leh eiei ia kane ka kam hapoh ka pork aba dei, ka CoMSO ka don ia ka hok ban shim ia ki lynti ban pynbeit kat kum ka riti synshar, kynthup ka jingmudui mukotduma bad ki jingiakhih ba jai jai, ban iada ia ka hok ki trai ri trai muluk bad ka burom jong ka Jaidbynriew”.