Agartala, Iaiong 21: U Myntri Rangbah ka Tripura Manik Saha u la pynpaw ka jingsngewkhia ha kaba iadei bad ka jingpynlong ia bun ki election ha ka shi snem bad ong ba kane kala ktah ia ki kam pynroi bad kumjuh ruh ka jinglut ha ka liang ka pisa bad kan ktah ia ka jingim ba man ka sngi jong ki nongshongshnong.
Haba kren ha ka jingiathir halor ka phang ‘One Nation, One Election’ (ONOE) , u Saha u la pynpaw ba ka jingpyntrei kam ia ka ONOE kan plie lad ia ki nongthep vote ba kin ioh ban pyndep hok ia la ka jong ka hok ban jied nongmihkhmat.
“Ban pynlong ia ka synshar paidbah ka ba pyniajan bad ki paidbah, ka sorkar hapoh ka jingialam u Myntri Rangbah duh ka ri u Narendra Modi u la wanrah ia ka ONOE Bill ha Parliament,” ong u Saha.
Shuh shuh u la kdew, “Lada ia ka ONOE la pyntrei kam, ki paidbah nongthep vote kin ioh ban pyndep hok ia la ka kamram ha ka bynta kaba dei. Ha ka por ba don ki election, ki kam pynroi ki shah ktah bha bad ka pule puthi ruh ka shah ktah namar ba ki hap phiah ia ki briew ban pyndep ia ki kam jong ka election, kumta ngi dei ban kyrshan ia kane ka sien jam ba shim da ka sorkar.”
Haba kren halor ki rai ba skhem jong u PM Modi, u Saha u la pynmynmaw halor ka Triple Talaq, da kaba ong, “Katba ki don shibun ki ummat kuratia kiba wohdingia kane ka rai, u PM Modi u la shim ia ka rai rangbah bad pynduh pyndam ia ka Triple Talaq.
