Shillong, Iaiong 20 : Ka A’chik Conscious Holistically Integrated Krima (ACHIK) kala byrngem ban pynlong ia ka jingiakhih ha ka jylla baroh kawei, lada jia ba ka sorkar jylla kam patiaw ia ka jingdawa ban thung ia u Chairman ban wan jong ka Meghalaya Public Service Commission (MPSC) na ka jaidbynriew Garo.
Ha ka shithi kaba la phah sha u Myntri Rangbah ka jylla u Conrad K Sangma, ka ACHIK kala ong, “Ngi dawa jur ba u Chairman ban wan jong ka Meghalaya Public Service Commission dei ban thung na ka jaidbynriew Garo, kaban long katkum ka jingbhah kaban long ryntih lang bad ban pynneh ia ka hok jong ka jingbym shah liang. Kano kano ka jingleh ka bym suidniew, kan long kum ka jingthombor ia ka hok, ka burom bad ia ka jingmihkhmat jong ki jaidbynriew Garo”.
“Lada ia kane ka jingdawa, la leh bym suidniew, kan pynlong ia ngi ban pynlong ia ka jingiakhih ha ka jylla baroh kawei bad ban wad ruh ia ki lad ki lynti ban iaid da ka lynti jong ka ain, ban iada ia ka dor jong ka riti synshar ha ka jingai ia ka hok bad ia ka jingioh bynta lang bad ka jingmihkhmat kaba biang na ka bynta baroh ki jaidbynriew trai ri trai muluk ha ka jylla Meghalaya,” kala byrngem.
Ka ACHIK kala kynnoh ba ka sorkar kala tyrwa ban thung ia u Chairman ka MPSC na ka jaidbynriew Khasi-Jaintia watla u Chairman u dei na katei kajuh ka kynhun jaidbynriew hi.
Kala ong ba ka Meghalaya State Reservation Policy, 1972, ka shim ba ki Khasi-Jaintia (kynthup ia ki Synteng) bad ia ki Garo kum ki ar tylli ki kynhun, ha kaba la bhah mar 40% ia ki, kumta da kaba buh ia katei ka nongrim hakhmat, ka jingthung ia ki dkhot bad ia u Chairman ka MPSC kadei kaba la bud naduh ki por kiba mynshwa da kaba shim mar kylliang hapdeng kitei ki ar tylli ki jaidbynriew kiba la ithuh da ka riti synshar ka ri.
Hynrei naduh ba la seng ia ka MPSC, ia ka kam Chairman la bat 9 sien da ki riewshimet kiba dei na ka jaidbynriew Khasi-Jaintia bad tang 7 sien la bat da ki riewshimet kiba dei naka jaidbynriew Garo, ka ACHIK kala ong, ba katei ka pawshai ba kala don ka jingleh shilliang khmat bad ka jingthmu kaba mynta ban thung Chairman biang na ka jaidbynriew Khasi-Jaintia kan lam shuh shuh sha ka jingbym ryntih ia ka rukom bhah bad kan pynkhein ruh ia ka nongrim jong ka jingai bynta lang.
“Ngi kyntait jur ia ki jingpynpaw da ki katto katne ki heh ophisar kiba don ha ka liang synshar ba ka jingai bynta lang kadei ban long hapdeng ki Khasi-Jaintia-Garo. Ka reservation policy kala kdew ba ki Khasi bad ki Jaintia kidei na kawei kajuh hi ka kynhun, kumta ka jingpynsngewthuh bakla ym tang ba ka long ka bym don nongrim hynrei kadei ka jingpyrshang ban ialam bakla ban pynskhem ia katei ka jingleh ka bym iahap. Ka long ruh ka jingpynkynmaw ia ka jingnsgewsih kaba la mih na ka jingpynpra ia u mot sahnam jong ka thma bah ba nyngkong, ia kaba la shim ba kadei ka jingpynpait pynpra. Ki paidbah ka Meghalaya kim dei kiba matlah ia ki jingpyrshang pynthame jong ki politishan” kala pynpaw ha ka shithi.
Nalor kane ka ACHIK kala kdew ruh ba ha ka 5 tarik u Iaiong 2022 ka Meghalaya High Court kala pynmih ia ka hukum, kala kdew shai kdar ia ka jingdonkam ban don ia ka jingpyntreikam ia ka Roster System kaba iaid ryntih bad kaba khuid ha ka jingpyntreikam pura ia ka reservation policy. Kala ong, ba ka iingkashari kala pynpaw ba ka jingbym don ka Roster ka ailad ban don ia ka jingshah liang, jingleh buittuh bad ka rukom leh kaba sniew da kaba pynkylla khongpong lut bad kumta kala pynsangeh ia ka jingthungkam thungjam katba ym pat pyntreikam shwa ia ka Roster. Ka iingkashari kala bthah shuh shuh ba kano kano ka jingthungkam nangne shakhmat kadei ban pynshong nongrim katkum ka jingithuh ia ki kam kiba lait bad ka jingpynshisha kaba thikna kaban iaid ryngat bad ka rukom long jong ka jingbhah.
“Halor katei ka nongrim, ka jingthung Chairman biang na kajuh hi ka jaidbynriew kan pynkhein ia ka jinglong jingman jong ka Reservation Policy bad ia ka jingbthah jong ka Meghalaya High Court. Kan long kum ka jingphah ia ka khubor kaba shai kdar, ba kala don ka jingleh khnang ha kaban iuhroit ia ka jingbhah na ka bynta ki jaidbynriew Garo na ka bynta ka jingmyntoi ha ka kam sain pyrthei bad ka jingiohnong kaba shipor” la pynapw katei ka kynhun.
