Nongstoiñ, Ïaïong 20: Ki paidbah ka thaiñ Nongtrai Sepngi kaba hap ha Mawshynrut Civil Sub Division, kila dawa ia ka Sorkar ba kan shna pynbha noh ia ki surok ha ka thain.
Kawei na ki surok kaba la sniew ha ha ka thain ka dei ka surok na Mawdiang sha Langdongdai-kaba la shna lyngba ka skhim shispah sngi.
U Secretary ka Synjuk ki Rangbah Shnong ka Langdongdai Area (SRSLA) bad Kardening Rongrin kila iathuh ba kane ka surok ka dei kaba donkam haduh katta katta khamtam ba ka thain ka dei kaba pynmih bun ki mar rep kum u sying, kwai, synsar, ki soh ki pai bad kiwei kiwei.
Kila ong ba ha ki snem bala leit noh, ki paidbah na ki 14 tylli ki shnong ka thain, kila ju iamih paidbah ban maramot hi ia ka surok da kaba trei bor met hynrei kim lah satia ban maramot paka ia ka jingsniew ka surok haduh ba ki kali kin lait iaid da kaba suk.
Ki la ong ba ka jingeh kaba kham hakhmat eh ka dei їa kiba pang ba shitom namar ba hap ban pynkit da u briew haba ki mut ban leit phah sumar.
La ong ba dei namar kitei ki jngeh ba ki paidbah ka thaiñ, ki hap ban shaniah beit ha ki nongai dawai kynbat khlaw haba ki pang ki shitom bad wat ki longkmie kiba armet ruh ki hap ban shaniah ha ki dawai kynbat, namar ki shem jingeh ban leit sha Hospital namar ka jingbym don їa ka surok kaba biang.
Kitei ki rangbah ki la dawa їa ka sorkar khamtam eh na u MLA ba don burom ba un phai khmat lem sha katei ka thaiñ ban pynbha bad maramot їa katei ka surok, khnang ba ki paidbah kin lait na ki jingeh ha ka leit ka wan.
