Leit kem ka SIT ia 3 ngut kiba pyniaid ia ki kam bymman na Mumbai
Shillong, Iaiong 20 : Ki Pulit ka Jylla Meghalaya kila ioh ban kyndang ia ka kynhun bymman ki nong Bangladesh, kaba ju pynrung tuh,pynshna ia ki kot ki sla thok bad ki bank account thok ia ki nong Bangladesh ha kylleng ka Ri India.
Ka jingkhynra ia kane ka kynhun kala sdang naduh ka 14 tarik u Rymphang 2025, hadien ba ki Pulit kila ioh khubor ba thikna ia ka jingdon jong ka kynhun ki Nong Bangladesh kiba ju wan kiew na Guwahati sha Shillong.
Haba shimkhia ia ka kam, ki Pulit kila buh ia ki jaka talasi ha Nongpoh ha kaba kila ioh ban bat ia 5 ngut ki briew ba suba nong Bangladesh ba kynthup ia 4 ngut ki rangbah bad iwei I khynnah.
Haba nyngkong, kine ki briew kila pynithuh ialade da kaba sei ia ki card Aadhaar bad PAN card hynrei da ka jingtohkit bniah la shem ba kine ki briew ki dei ki nong Bangladesh kiba la rung be-ain sha India la arbnai eiei da ka jingiarap jong ka kynhun ba pynrung briew tuh na khappud. Kine ki briew kila leit shaduh sha Mumbai ban wadkam bad mynta kila wanphai pat ban leit sha Bangladesh.
Kine ki nong Bangladesh kila phla ba kila ioh ia ki kot ki sla nong India-kynthup u Aadhaar bad Pan card-lyngba u Shaikh Mohd Mujib, uba sah ha ka thain Sewri, Mumbai. La kynnoh ba u Mujib u dei uba hakhmat eh ban pynbiang ia ki kot ki sla ia ki briew na Bangladesh bad ju pynbeit ruh ia ki briew ban wan ialam ia ki nong Bangla lyngba ki jaka khappud kum ha Mumbai, Ahmedabad bad kiwei kiwei.
Ka jingtohkit kala sei pyrthei ruh ia ka kam bymman ha Mumbai ba ialam da ka Nusrat A Kazi bad u Jabir Yunus Shaikh, kiba ju pyndonkam ia ki kot ki sla thok ban pynplie bank account ia ki nong Bangladesh ba wan rung tuh. Ia kine ki account la pyndonkam pat ha ki kam shim rai bad cybercrime, kynthup ka jingdie tuh sha ki briew kiba pyniaid ia ki cyber crime ban kamai pisa da ki kam shukor.
Da kane ka jingshem, ka Kynhun Special Investigation Team (SIT) ba ialam da u Assistant Superintendent of Police (ASP) Ashu Pant hapoh ka jingbtin lynti u SSP Ri-Bhoi Vivekanand Singh Rathore, kala hiar sha Mumbai ban thwet ia ki briew kiba donkti.
Ka kynhun da ka jingiarap u Commissioner of Police ka Navi Mumbai, Miland Bharambe bad ka kynhun khynra ki Pulit ka Mumbai, ka SIT kala pynlong ia ka jingkhynra ban eh shitaiew lynti ha kylleng ki jaka ka Navi Mumbai bad South Bombay.
Ha kane ka jingkhynra, ka SIT kala ioh kem ia ka Nusrat A Kazi bad ia u Jabir Yunus Shaikh na Koparkhairane bad Ulwe katba ia u Shakh Mohd Mujib la ioh ban kem na Rafi Ahmed Kidwai Marg, South Mumbai. Ka SIT kala ioh ruh ban kurup ia bun bah ki kot ki sla ba shna thok, ki kor digital bad ki tiar ki tiar ba shna thok ia ki ID.
Ia kine ki briew la wan ialam noh sha Meghalaya da ka jingpan jingbit ban ioh pynlong ia ka jingtohkit kaba bniah.
Haba pynpaw ba kane ka case ka dei ka jingpynkyndit bynriew ia ka jinglong shngain ka Ri, u SP ka Ri-Bhoi ula ong “Kane ka case kam dei kaba shu jia ryngkat. Ka pyni ia ka jingshyrkhei ka kam pynrung tuh ia ki nong Bangladesh, shna tuh ia ki kot ki sla bad leh ia ki kam shukor pisa, kiban ktah jur ia ka jinglong shngain ka Ri. Da ka jinglong laitlan ki jaka khappud ka Bangladesh kaba buh jingeh ban peitngor ia ki bor Pahara-khamtam ha ki Jylla kum ka Meghalaya-bad ka jingkynrum kynram ka sain pyrthei ha Bangladesh, ka jingma bala buh da kine ki nongwan rung tuh kala kiew bun shah bha”.
