Shillong, Iaiong 16 : U Symbud Myntri Rangbah ka Jylla ba khmih ia ki kam Pohiing (Police) Bah Prestone Tynsong ula bthah ban pynkhlain bha ia ki jingpeitngor ha ki jaka khappud namar ka jingjur ka jingwan rung tuh ki nong Bangladesh sha Jylla.
U Symbud Myntri Rangbah ula pynpaw ia ka jingsngewkhia kaba jur ia ka jingrung tuh ki briew na Bangladesh shapoh u pud u sam ka Meghalaya bad ong ba kane ka dei ka kam kaba hap ban shimkhia bha da ki Pulit bad ki BSF.
Haba kren hadien ka jingialang bishar kam bad ki Heh Pulit ha Ri-lum Garo, u Bah Prestone ula ong “Ngi la iakren bniah ia ka kam ba iadei bad ka jingwan rung tuh ki nong Bangladesh, kaba dang ka jingsngewkhia kaba jur ia ka Tnad Pulit. Ka dei ka kamram jong ngi ban pynthikna ba kum kine ki kam kim dei ban jia”.
U Bah Prestone ula iaroh ia ki jingpyrshang ban bat ia ki briew ba rung beain, haba ainam ia ka jingiatreilang kaba iajan hapdeng ki Pulit ka Jylla, ki shipai Border Security Force bad ki Custom.
“Ki Pulit jong ngi, da ka jingiasngewthuh jingmut bad jingiatreilang bad ki shipai BSF bad Custom, kila lah ban bat ia ki briew kiba wan rung tuh hashwa ba kin ioh leit sha kylleng ki jaka hapoh ka Ri India” ula ong.
Ula ban jur ruh ia ka jinglong kongsan ban pynkhlain ia ka jingiatreilang hapdeng ki bor ka ain bad ong “Nga la bthah ia u DIG ban pynthikna ia ka jingiatreilang bad ki bor pahara ka Sorkar Pdeng bad ki Custom kiba don ha ki jaka khappud”.
 Bah Prestone Tynsong ula bthah ban pynkhlain bha ia ki jingpeitngor ha ki jaka khappud namar ka jingjur ka jingwan rung tuh ki nong Bangladesh sha Jylla){kind=link}