Shillong, Iaiong 15 : U Superintendent of Police ka Ri-Bhoi VS Rathore ha ka sngi Ba-ar, ula bthah ia baroh ki Officer-in-Charge jong ki Police Station, Police Outpost, Beat House, PICs, ADCs bad kiwei, ba kin thaw ia ki Community Liaison Group (CLG) hala u jong u pud u sam treikam.
Ka hukum bala pynmih da u SP ka ong ba kine ki Committee kin kynthup ia ki nongshongshnong ba don burom jong ka thain ki bym don dak sniew, kynthup ki nongtrei Sorkar bala shongthait bad ki khlieh jong ki jaka pule, lada don, kum ki nongmihkhmat jong ka CLG ba kin ai jingmut ia ki Pulit ha ka jingtreikam jong ki.
Ka Community Liaison Group kan don ia ki nongmihkhmat ba khlem noh shiliang hapdeng ki shynrang bad ki kynthei bad kiwei kiwei ki briew kiba trei ia kino kino ki kam, jong ka imlang sahlang ha ki shnong kiba hap hapoh ki Police Station.
“Ym dei ban pynrung dkhot ha ka Community Liaison Group (CLG) ia ki briew kiba la shah rai pynrem ha ka Iingkashari lane kiba dang ban shah pynngat kyndon ha ka Iingkashari ha ki kam bymman, kiba la shah weng lane shah pynbor shongthait na kano kano ka kam halor ka nongrim ki kam bamsap, ka jingkhlem akor ne jingleh bym suidniew” ong ka hukum.
Nalor kane, la ong ruh ba ki briew kiba don jingiadei bad kino kino ki seng sain pyrthei ne ki seng ba don jingiadei bad ki seng sain pyrthei kin ioh bynta ban shah pynrung dkhot ha ka CLG.
Ka la ong ba ka Community Liaison Group kan ithuh ia ki jingdonkam ia ki bor pulit ha ka thain kynthup ia kiba la don lypa bad kiban dang mih, ia kaba yn shim khia da u Ophisar-in Charge jong ka Thanad haba pynkhreh ia ka buit treikam bad ka plan treikam kaba man la u snem hala u pud u sam, ba un aiti sha kane ka Ophis.
Ka hukum kala ong ruh ba kane ka CLG ka dei ban iakynduh man ka por haba donkam bad la kumno kumno ruh shisien ha man ka lai bnai. Ka jingialang jong ka CLG kan dei kaba iashimbynta da ki SDPO, CI, OC, & IC bad ka dei ban ailad ruh ia ka jingiashimbynta ki paidbah.
 hala u jong u pud u sam treikam.){kind=link}