Shillong, Iaiong 13 : Ki kynhun Sengbhalang ka Ri-lum Khasi, Jaintia bad Garo, kila pynim biang ha ka sngi Saitjain, ia ka synjuk Confederation of Meghalaya Social Organisation (COMSO) ha ka jingialang kaba la pynlong ha sor Tura.
U President ka Hynniewtrep Youth Council (HYC) Bah Roykupar Synrem ula shah jied kum u Chairman katba u President ka Jaintia National Council (JNC) Bah Sambormi Lyngdoh bad u President ka A’chik Progressive Approach (APA), kila shah jied kum ki Vice-Chairman.
U Balkarin Ch. Marak, Acting Chairman ka Garoland State Movement Committee (GSMC), ula shah jied kum u General Secretary, bad u Bah Bandari Ryntathiang, President ka Confederation of Ri-Bhoi People (CORP), nalor u Bah Roytre Dkhar, General Secretary ka Jaiñtia Students Movement (JSM) kum ki Additional General Secretaries.
Ka jingialang kala thung ruh ia ki Organising Secretary na baroh lai tylli ki thain : Jacius Sangma ia ka Ri-lum Garo, Rhembor G. Saibon ia ka Ri-lum Khasi bad Nangshwa Sutnga ia ka Ri-lum Jaiñtia.
Ia ka kam Publicity Secretary la ai sha u Bah Jubanjoy Swer bad Tony Marak na ka bynta ka Ri-lum Khasi & Jaiñtia bad ka Ri-lum Garo. Kala thung ruh ia u Cherian Momin, u nongtrei mon sngewbha kum u Adviser ka COMSO.
Haba kren ha ka jingialang, u Bah Roy kupar ula ban jur ia ka jingkongsan ban wanrah lang ia kajuh ka thong na ka bynta ki paid trai muluk jong ka Jylla. Ula pynkynmaw ia kito kiba la don ha ka jingiakren ba la dep ha Shillong, ha kaba la iamynjur lang ban wanrah ia kawei ka rynsan ka ban shimkhia ha kaban leh eiei ia ki mat bad ki jingtynjuh kiba long kumjuh.
Kaba hakhmat eh na kine ki jingeh ka kynthup ia ka jingdawa ban pyntreikam ia ka Inner Line Permit (ILP), ka jingpynkylla ia ka Meghalaya Residents Safety and Security Act (MRSSA), bad ka jingwanrah ia ka jingai bhah ba 44% ia ki trai muluk ha ki kam ka Sorkar Pdeng.
“Ka jingpynim ia ka COMSO namar kata, ka wanrah lang ia ka bor bad ka jingkut jingmut jong ki jaidbynriew ka Ri-lum Khasi, Jaintia bad Garo, kaba pynkha ia ka kynhun ka ban leh eiei halor ki jingeh ba iakynduh” ong ka COMSO ha ka kyrwoh.
Nalor kane, ka kyrwoh ka ong “Kawei na ki mat ba hakhmat eh bala iakren ha ka jingialang ka dei halor ka jingdonkam ban leh eiei ia ka jingkyntur pud jong ka Assam, bad kumjuh ruh ka jingwan buhai shnong beain da ki bar jylla ha Meghalaya”.
“Ia kane ka kam la pynsngew da u John Marak, uba la kyntu ban hap tuklar mardor namar ka hok halor ka khyn dew ka shyiap bad ka jingiada ia u pud u sam ki trai muluk ki dei kiba kongsan bha n aka bynta ka jingiai neh jong ki paid trai muluk ha Meghalaya. Kane ka mat nalor ka jingiada ia ka kolshor, ka ktien ka thylliej bad ki mar poh khyndew, kin long ki mat ban iasaid tyngeh da ka COMCO” kala bynrap.
 ha ka jingialang kaba la pynlong ha sor Tura.){kind=link}