New Delhi, Nailur 01: Ka Iingdorbar Parliament ba kynthup ia ka Lok Sabha bad Rajya Sabha Secretariat, kila kynmaw burom ia ka lyngkhuh sngi kha jong u (L) Purno A Sangma hynne ka sngi palei ha Central Hall jong ka Iingdorbar Parliament.
U Deputy Chairman ka Rajya Sabha, Harivansh, ula buh syntiew ha ka dur jong u (L) P.A Sangma nalor ki Heh Ophisar ka Rajya Sabha bad ka Lok Sabha.
Ka Iingdorbar kala pynlong ruh ia ka jingpyni nam ia ki kot bala thoh da bad halor u PA Sangma, kiba don ha Library ka Parliament hapoh ka Central Hall. Ka Lok Sabha Secretariat ka la sam ruh ia ki Kot lyngkdop halor ka jingim u PA Sangma bala thoh da ka ktien Hindi bad English sha baroh ki kynrem ki Lynda.
Ia u (L) Purno A Sangma la kha ha ka 1 tarik Nailur 1947 ha shnong Chapahati, West Garo Hills bad u dei u briew uba la trei ia kiba bun ki kam ha ka jingim jong u ba kynthup ia ka lam Lecturer, Nongiasaid Ain bad Nongthoh Khubor hashwa ba un rung sha ka kam sain pyrthei.
Ha ka 23 tarik Jymmang 1996, ula shah jied khlem ka jingialeh pyrshah kum u Speaker ka Iingdorbar Lok Sabha da kaba ioh jingkyrshan na baroh ki seng sain pyrthei. Kum u Speaker, u PA Sangma ula pynthikna ba ki Dkhot ka Iing ki bud ryntih ia ki Rules wat hapdeng ka jingthnem ha ka jingiatai.
Nalor ka jinglong MP ka Lok Sabha haduh khyndai sien, u PA Sangma ula shakri ruh kum u Myntri ka Sorkar Pdeng ha ki Ministry bapher bapher kum ka Home Affairs, Commerce, Industry, Labour, Information & Broadcasting bad Coal. U PA Sangma ula khlad noh ha ka 4 tarik Lber 2016.
