Huri hura Aadhaar | Kiba kwah ioh jingmyntoi na ka Sorkar kin leh, ki bym kwah ka shong ha ki : DyCM

Ka Sorkar kam pynbor ia ki paidbah ban pynrung kyrteng Aadhaar

Shillong, Iaiong 11 : U Symbud Myntri Rangbah ki kam Pohiing (Police)Bah Prestone Tynsong ha ka sngi Thohdieng, ula ong ba ka Sorkar kam shym la pynbor satia ia ki paidbah ba kin pynrung kyrteng Aadhaar.

Haba kyntait ban kynthoh ia ka jingiakhih ka Awaken India Movement (AIM) pyrshah ia ka jingpyniasoh Aadhaar, u Bah Prestone ula ong “Nga la iohi ia ki katto katne kibriew kiba pyrshah. Ngam lah ban ong eiei ia ki. Hynrei lada ki kwah ban ioh ia ki jingmyntoi bala ai da ka Sorkar, la ka dei ba ai ka Sorkar Pdeng ne Sorkar Jylla, ka shong ha ki. Ngim lah ban pynbor ia ki ban pynrung kyrteng Aadhaar lada ki sngew ba kam long kaba donkam iaki”.

Haba pynpaw ba kane ka kam ka dei ka mat kaba la slem bha, u Symbud Myntri Rangbah ula ong ba ki paidbah hi dalade mynta kila sdang ban leit pynurng kyrteng Aadhaar.

“Ngan iathuh ia phi kawei, haba nyngkong ki paidbah kila pyrshah jur bha ia ka Aadhaar card hynrei nga ong ia phi ba dang khyndiat por mynta ki paidbah dalade kila leit ban pynrung kyrteng ha ki centre ban ioh ia u aadhaar card” ula kynthoh.

“(Kane ka long) namar wat haba phi leit rung klas ha kino kino ki jaka pule lane phi donkam ia u Aadhaar card ban ioh ia ki marbam rashon, phi donkam ia ka aadhaar card wat ban ioh ia ki health insurance bad kiwei kiwei. Kat ki kam mynta ki donkam beit ia u Aadhaar” ula bynrap.