Shillong, Iaiong 8: Ka Sorkar Meghalaya ha ka sngi Balang, kala pynbna ba ka EasyLottery, ka lottery da ka kor digital ba nyngkong eh ha India kaba la pynlait paidbah da ka jylla ha u snem 2024, ka la iakynduh ia ki jingeh na ki jingshah tynjuh ha ka ain. Ka sorkar ka don ia ka kyrmen ba yn sa lah ban pynbeit noh shen.
U Myntri Rangbah ka Jylla Conrad K Sangma, uba pyllait paidbah ia kane ka lottery ha New Delhi, ula kubur ia kaei kaba jia mynta hynrei ula pynpaw ba um pat shong bishar bniah ia ka rukom trreikam jong ka.
“Kat kum ka jingtip jong nga, kane ka dei ka ba nyngkong eh ha ka Ri ha ka por ba pyllait paidbah ia ka” ong u Conrad haba bynrap “ Ngi la sngewskhem bha ia ka namar ka jingstad technology ba la pyndonkam. Ka jinglong kaba shai kaba ka la pynthikna ka la pynlong ia ngi ban ngeit ba kane ka lah ban long ka lawei jong ki lottery ha India.”
Hynrei u la kubur ba katei ka jingthmu ka la mad ïa ki jingeh ha ka jingtreikam. “Da ki jingeh ba bun kiba mih, ka lottery kam shym la treikam kat kum u pud uba ngi la thmu,” u la ong.
Haba batai ïa ka jingthmu jong ka jylla ha lyndet jong kane ka lottery, u la bynrap, “Ka jingwan rung jong ka technology la ïohi kum ka lad kaba thymmai ban pynthymmai ïa ka rukom treikam. Hynrei, kumba la khmih lynti, ki jingeh ha ka liang ka aiñ ruh ki la mih.”
U Conrad u la pynshai ba ki jingïakynad ha ka liang ka aiñ ki iatyngkhuh nyngkong eh bad ki nongpynïaid lottery ha kylleng ki jylla bapher bapher, ym tang ha Meghalaya.
“Ki don ki mukotduma kiba dang ïaid shakhmat, katto katne na kine ki dang don ha ka jingïakhun,” u la ong. “Ngi kyrmen ban ïoh ïa ka jingpynbeit shen. Ka thong jong ngi ka long ban wanrah ïa ka jingshai kaba kham bha, ban tei ïa ka jingshaniah ha ka rukom treikam, bad, shisha, ban pynmih kham bun ka khajna na ka bynta ka jylla.”
U la kren ruh halor ki jingeh kiba kham jylliew jong ka kam lottery ha India.
“Ka dei ka karkhana kaba heh bha, ha kaba ki jylla bapher bapher ki don la ki jong ki aiñ bad ki kyndon. Dei na kata ka daw ba kane ka jingthmu ka la ïakynduh ïa ki jingeh ha ka liang ka aiñ. Ngin hap ban ap bad peit, hynrei nga kyrmen ba ïa kane ka kam yn sa pynbeit noh kloi.”
