Shillong, Iaiong 08: Ka Kynhun Myntri ka Sorkar Jylla ha ka sngi Ba-ar, kala ai jingmynjur ia ka Meghalaya Witness Protection Scheme, 2025 ban ai jingiada ia ki nongai sakhi ha ki jingjia bapher bapher hapoh ka jylla.
Haba pynbna ia kane hadien ka jingialang, u Myntri Rangbah ka jylla Conrad K Sangma ula ong, ba ki don 3 tylli ki ain kiba thymmai jong ka BNSS kiba la pyntreikam da ka sorkar pdeng bad ki sorkar jylla bad ha katei ka ain kaba thymmai kala don ka kyndon ban ai jingiada ia ki nongai sakhi bad la wanrah ia kane ka skhim ban ai jingiada ia ki nongaisakhi.
“Da kaba pynshong nongrim ia katei, ngi lah mynjur ia ka Meghalaya Witness Protection Scheme, 2025 da ka jingthmu ban ai ka jingiada kaba kongsan ia ki nongai sakhi halor ki jingjia ki bapher bapher” ula ong.
Haba batai halor kane ka scheme, u Myntri Rangbah ula ong ha man la ki district kin don ki committee, kaban khlieh da ki district magistrate bad kin don ruh ki dkhot na ki bor sorkar bad kin sa shim ia ka rai katkum ka jinglong jingman jong ka jingshah byrngem byrsit bad ia ka jingdonkam ban ai ia ka jingiada ia ki nongai sakhi, kaba lah ban long da kaba ai ia ki nongpahara khnang ba kin lah ban ai ia ka sakhi ka jongki ne ban ai ia ka jingphla lyngba ka camera.
“Kumta ki don bun ki kyndon bapher bapher ban ai jingiada bad kadei kaba la kdew ha ki Rules hynrei kumba nga ong, ka jingmut hi ka long ba kitei ki kyndon kidei kiba la don ha ka ain kaba thymmai bad man la ki jylla ki hap ban wanrah ia ki skhim bapher bapher” ula bynrap.
