Shillong, Nailar 31: Ka Iingkashari Meghalaya High Court hynne ka sngi Balang kala bthah ia ka Sorkar Jylla ban aiti ia ka kaiphod hapoh 10 sngi kaba kdew ia ka jingbuhpor ban shna ia ka Compost Plant bad ka jingiarap ia ka Municipal Board ban weng ia ki jingeh na u niut ha Jowai, ka District Headquarter ka West Jaintia Hills.
Ia kane la hukum la pynmih da ka Iingkashari ki arngut ki Nongbishar ba kynthup ia u Chief Justice Sanjib Banerjee bad u Justice W Diengdoh haba shong bishar ia ka PIL bala mudui da ka Synjuk ki Waheh Shnong, Jowai.
“Ka jingbishar ia kane ka kam kan long biang hadien 10 sngi bad ka Sorkar Jylla kan pynpaw ha ka dur jong ka kaiphod ban aiti da ki Ophisar ba dei khmih, ia ka por bala buh ban shna ia ka Compost Plant bad ka sienjam ba ka Sorkar ka shim ban iarap ia ka Municipal Board ban weng ia ka jingeh na ka kam niut” ong ka hukum haduh ban da dep ka Plant.
Ka Sorkar Jylla kala pyntip sha ka Iingkashari ba kala tyrwa ban shna ia ka Compost Plant ha kane marjan ka Jowai ban weng ia ka jingeh na u niut ha sor Jowai.
Hynrei ki Nongmudui kila ujor ba u niut ula sdang ban lang kynton biang bad ka sienjam bala shim shipir ka dei ia kaban hap pynim biang khnang ban pyllait ia ka sor Jowai na ka jaboh jabain.
Ka hukum ka ong ba kampher kano kano ka plan ba mut ban leh hadien habud, dei pat ban shim ia ki sienjam ba mardor da ka Municipal Board ban weng ia ka jingeh ba na ka sngi sha ka sngi halor ka jingkynton u niut.
“Ym lah ban pdiang khamtam hashuwa ban kut ka aiom lyiur ruh, la shu ieh ia ki niut ha surok na shabar ka Iing” kala ong.
Ka Iingkashari kala bthah ruh ia ka Municipal Board ban wad ia ka lynti kumno ban tem ia kane ka jingeh wat haba ka Sorkar Jylla kala plan ban shna ia ka Compost Plant lane ki sienjam ban weng shirta ia ka jingeh.
Ka Iingkashari kala buh ban shong bishar biang ia kane ka mukotduma ha ka 14 tarik u Nailur.
