Shillong, Nailur 1: Ka Seng Samla Mawlai Pyllun (SSMP) ka la kyntu ia u Myntri ka tnad Arts & Culture ka sorkar jylla Bah Sanbor Shullai ba un tuklar lang kham kloi khnang ba yn lah ban pynkynriah noh ia ka CRPFC Camp kaba don mynta ha Mawlai bad ha katei ka jaka yn shna noh da ka jaka ban sumar ia ki briew kiba la kyrni ha u drok bad kiwei ki jingdih kiba la ktah ia ka koit ka khiah jong ki.
“Namar ba kane ka jaka ka hap ha ka jingpeit jong ka tnad Arts & Culture dei na kata ka daw ngi wan ban kyrpad lang ia u ban pyntyllun lang kham stet ia ka kam na ka bynta ka jingmyntoi jong ki nong Mawlai baroh kawei,” ong u President ka Seng u Samla Samuel Biam haba kren bad ki lad pathai khubor.
Ki nongialam ka Seng ki la pynpaw ruh ba ki khmih lynti ba kane ka sorkar jylla kan pynstet ia katei ka kam kumba ka la pyni dak khnang ba ha katei ka jaka yn pynieng noh pat da ka De-addiction cum Recreational centre ban sumar ia kito kiba la ngop ha ka jingkyrni jong u drok bad kiwei ki jingdih.
Shuh shuh u la ong ba ki la kyrpad ruh ia u Myntri katei ka tnad ban iakren ruh bad u Myntri ka tnad Social Welfare ban wanrah noh da katei ka jaka sumar ba kyrpang na ka bynta kitei kiba la ngop ha kitei ki jingdih.
U Bah Biam u la iathuh ruh ba ka jingdon ki samla ba ngop ha u drok ne kiwei ki jingdih kam dei shuh kaba jia tang ha Mawlai hynrei ha baroh kawei ka jylla bad dei na kane ka daw ba kum ka seng kaba peit ia ka bha ka miat jong ki samla ki sngewdei ban don noh da ka Centre ban peit kyrpang ia kito kiba kylla ki sohpdung ha kitei ki jingdih.
