Shillong, Lber 28 : U Myntri Rangbah ka Meghalaya Conrad K. Sangma ha ka sngi Thohdieng, u la pyntip ba ka sorkar ka don ia ka jingthmu ban wanrah ia ka project ka ban pyniasoh ia ki katto katne ki shnong ba jngai da ki jingkieng doidoi.
“Ki don bun tylli ki Shnong, kiba la phiah da ki wah. Ka Sorkar kala pynwandur ia ka project, kaba la bei tyngka da ka World Bank, ka ban pyniasoh ia ki shnong hapoh ka Jylla, ha kaba yn pyntrei ia ki jingkieng doidoi” ong u Myntri Rangbah haba plie ia ka jingkieng doidoi ha Dombagre, kaba hap hapoh Dalu Block, West Garo Hills.
Kane ka jingkieng ba 80 meter ka jingjrong bala shna halor ka wah Bandra, ka dei kaba pyniasoh ia ka surok Sesengpara Kherapara sha ka shnong Dombagre bad kan ai jingmyntoi ia palat 2000 ngut ki briew.
Ia kane ka jingkieng la tei ha ka jinglut kaba kot T. 2.08 klur. La wanrah ia ka hadien ba ka jingkieng dieng kala jot bad shah rong noh ha ka jingshlei um ba jia ha u snem 2022 ha ka thain Dalu.
“Kane ka jingkieng kala khate ia ka jingjngai ban iaid kjat da 11 Km” ula ong haba pynpaw ba kane ka jingkieng doi doi kan ai jingmyntoi shikatdei eh ia ki paidbah.
Ula shim ruh ia ka kabu ban pyntip sha ki paidbah ba katba kane ka jingkieng doidoi ka dei ka lynti ba shipor ia ka shnong, ka Sorkar kan sa wanrah shen ia ka project ban tei syndon da ka jingkieng maw. Ula pyntip ruh ba ka Sorkar ka don jingthmu ban pynthikna ia ka roi ka par ba pura hapoh ka Jylla.
Ha ka jingleit iuhkjat ha Dalu, u Myntri Rangbah ula iakynduh ruh ia ki doktor bad ki nonghikai jong ki jaka pule bapher bapher kiba hapoh hapoh ka Dalu Block bad sngap ia ka jingsngewkhia ba ki don ban pynpaw. Ki sengbhalang bad ki paidbah ruh kila aiti ia ki dorkhas ban pynbha ia ka CHC, PHC ha ka thain kynthup ka jingpyrpad ban pynieng ia ki mobile tower.
U Myntri Rangbah ula sngap ruh ia ka jingsngewkhia bala pynsngew da ki paidbah ha kane ka prokram, kaba long shibynta jong ka CM-Connect, ka flagship prokram jong u Myntri Rangbah ban sngap bad ban weng ia ki jingeh jong ki paidbah.
