Shillong, Lber 28 : U Myntri Rangbah ka Assam Himanta Biswa Sarma ha ka sngi Thohdieng ula ban jur ia ka jingdonkam ia ka Meghalaya bad Assam ban iatreilang hapoh ka jingbtin lynti ka Sorkar India ban ratdyngkhong ia ka kam khaii droks hapoh ka thain.
Haba iakren bad ki nongthoh khubor, u Himanta ula ong “Phi iohi ha ka ri jong ngi, ka jingiatreilang ka dei kaba kyrshan da ka Sorkar India. Ki Jylla ki iawanlang hapoh ka jingialam ki bor pahara ka Sorkar Pdeng ka dei kaba biang eh iangi hynrei lada ngi baroh arjylla ngi iatreilang tang para mangi khlem ka jingiadonbynta lang ka Sorkar Pdeng, ka lah ban dei ka bym bha satia. Kumta, ka jingmut hi ka long ba ka Sorkar Meghalaya bad Assam kin iatreilang hapoh ka jingbtin lynti ka Sorkar India”.
Haba pynpaw ba baroh ki Sorkar Jylla kila pyrshang katba lah ban leh eiei halor kane ka kam, u Myntri Rangbah ka Assam ula ong “Kane ka dei ka jingktah kaba khraw bha bad ki don bun jait ki rukom treikam jong ki nongkhaii droks bad nga sngew ba lada ngi iatreilang ban iakhun ia ki nongkhaii droks, ngin long ki nongjop ia kane ka thma”.
Halor ka jingbym lah ban kem ia ki kingpin ba pyniaid ia ka kam khaii droks, u Himanta ula ong “Ki kingpin kim don satia hangne. Ki kingpin ki don sha shiliang khappud. Lehse kilah ban don ha India ruh hynrei ki pyniaid iew ia u droks lyngba ki agent bapher bapher bad hateng hateng ki wanrah ia bun bah u droks bad hateng hateng ki wanrah khyndiat bha, kaba shem jingeh ban ioh bat”.
Ula ai nuksa “Lada shiphew ngut ki briew ki don hapoh ka rel ban leit sha Delhi bad baroh ki ia rah mar shiteng gram u heroin ha ki pla jonng ki, kan long kaba eh bha ban ioh kem. Kumta, ki don ia baroh ki buit treikam, ki lah ban rah ia u droks da kaba shu iaid kjat ruh. Lada u briew na Guwahati u sdang iaid kjat sha Shillong bad u droks ha ka pla, kan long kaba shem ban shem ia u. Ki don bun ki buit treikam jong ki bad ki Pulit ki hap ban trei kham bha ban ia ki bad kane ka dei ka lynti ba kumno ngi dei ban leh”.
