Shillong, Lber 28 : U Myntri Rangbah ka Assam Himanta Biswa Sarma ha ka sngi Thohdieng ula ong ba baroh ar Jylla ka Assam bad Meghalaya ki kwah eh ban pynbeit noh kham kloi ia ka jingiakajia pud ha ki hynriew tylli ki jaka bym pat pynbeit.
Kat kum ka jingong jong u, lai tylli na kine ki hynriew tylli ki jaka iakajia ki dei kiba suk bha ban pynbeit.
Haba iakren bad ki nongthoh khubor shabar jong ka passing out parade ha NEPA, u Himanta ula ong “Na ka liang ka Assam, ngi kwah eh ban pynbeit noh ia ki jingiakajia ha ki hynriew tylli ki jaka ba dang sah bad na kine, lai tylli ki dei kiba lah ban pynbeit ha kano kano ka por. Nga tharai ka Meghalaya ka ap ban iapynbeit shisyndon ia baroh. Ngi la leh ia ki kam bad nga thikna ba ngin sa pynbeit noh ia kiba dang sah da ka jingiasngewthuh jingmut”.
“Phi iohi ba kane ka kynthup ia ka jingsngew ki briew na baroh artylli ki Jylla kumta, ban buh ia ka por kam long satia hynrei ha kajuh ka por ngi kyrmen bad duwai ba ngin sa pynbeit noh kham kloi” ula bynrap.
Haba kylli, u Myntri Rangbah ka Assam ula ong “Ka survey of India kala leh ia ka jingphiah pud bad kila iaid shaid shaid hynrei kaei kaba ngi la iasoi hakhmat u Myntri kam Pohiing kala tehsong ia baroh ar ki Sorkar”.
