Shillong, Lber 21: Ka Sorkar Pdeng, kala pyllait ia ka instalment ba khatduh jong ka scholarship ba kot T. 85. 0779 klur hapoh ka skhim “Umbrella Scheme of Post Matric Scholarship for ST Students for the Academic Session 2024-25” sha ka Jylla.
Ia kane la pyntip da u Myntri Rangbah ka Jylla Conrad K Sangma haba pyntip ruh ba ka pisa scholarship kan sa paw noh ha ki bank account jong ki samla pule tang ha kine ki 1-2 sngi ban wan.
Haba thoh ha X, u Myntri Rangbah ula ong “ Nga sngewkmen ban pyntip ba ka Sorkar Pdeng kala pyllait ia ka instalment ba khatduh jong ka scholarship ba kot T.85.0779 klur hapoh ka skhim “Umbrella Scheme of Post Matric Scholarship for ST Students for the Academic Session 2024-25”.
U Myntri Rangbah ula pyntip ba ki don haduh 76,755 ngut ki samla pule kiba aplai ia ka post matric scholarship ha Jylla.
U iathuh ba ia ka instalment ba nyngkong ba kot T. 42.32 klur la pyllait ha ka 24 tarik Jylliew 2024 bad ia kane ka pisa la sam sha ki 17,364 ngut ki samla pule.
Ia ka instalment kaba ar ba kot T. 66.67 klur la pyllait ha ka 20 tarik Naiwieng 2024 bad ia kane ka pisa la sam sha ki 32,064 ngut ki samla pule.
Ia ka instalment kaba lai bad ba khatduh ba kot T. 85.0779 la pyllait ha ka 21 tarik Lber 2025 bad ia kane ka pisa yn sa sam sha ki 27, 327 ngut ki samla pule.
U Myntri Rangbah ila pynpaw ba ka Sorkar kala kut jingmut ban nang pynjanai bad pynsted ia ka scholarship manla u snem ban pynthikna ia ka jingkyrshan ba kham kloi ia ki samla pule ka Jylla.
