Guwahati, Lber 19: Ki heh ophisar ka tnad Forest ha ka sngi baar, kila lap ia ka met kaba la pyut jong kawei ka hati kynthei kaba don ha khappud jong ka jylla Assam-Meghalaya hajan Guwahati.
Ki heh ophisar kila pynpaw ba katei ka hati kynthei kadei kaba la pun khun bad la suba ba kala shah pyniap ha ki nongbeh mrad na ka bynta ban ioh bam ia ka doh hati.
Ia katei ka met kaba pyut, la lap na ka khlaw kaba don ha East Apricola hajan ka shnong Topatoli kaba don ha khapsor bad ka nongbah Guwahati.
Ki ophisar kila iathuh ba kila shem ba ki nongbeh mrad kila pyniap bad kila rah tang ia ka doh jong ka hati.
“Ka bynta kaba sah jong i khun hati ka dang don. Ngi suba jur ba ki nongbeh mrad kila donkti ha kaban pyniap ia ka hati ban ioh ia ka doh jongka. Ka jingtohkit halor kane ka jingjia kala iaid shakhmat” la ong u ophisar ka tnad Forest.
Ha ka jingtohkit kaba mardor, la shem ba katei ka hati kala shah pyniap ha kine ki 15 sngi kiba la dep, ha ki katto katne ngut ki nongbeh mrad kiba la suba jur ba kidei na ka jylla Meghalaya.
Ka doh hati kadei kaba la shim, ba ka long kaba bang bha ha ki katto katne ki bynta jong ka thain shatei lam mihngi jong ka ri India, khamtam ha Arunachal Pradesh, ha kaba bun sien ki nongshong shnong ha ki thain nongkyndong ki ju ia sam bad die ruh ha ki iew.
“Ka luta kadei ka dawbah jong ka jingshah pyniap ki hati, hynrei ka jingdawa ia ka doh hati kadei ruh kawei na ki dawbah kaba la pynlong ia ki hati kiba rit ruh ba kin shah pyniap” la ong uwei uba don jingsngewkhia ia ka mariang.
