Nongpoh, Nailar 30 : Ka sur jingdawa ban pynkylla biang ïa ka Memorandum of Understanding ba la ïa soi hapdeng ka Assam bad Meghalaya na ka jingpynbeit pud ha ka wat ba nyngkong ka la nang sawa jam hadien ba ki nongïalam ka Hynñiewtrep Youth Council (HYC) ka la pynlong da ka jingïaid paidbah ha Patharkhmah da kaba rah ruh da ki jingthoh ba dawa ban wanrah biang ïa ka shnong Lyngkhung bad Jibrigoan shapoh ka jylla Meghalaya.
Lah ban kdew ruh, ba kane ka jingmih ki nongialam ka HYC ban pynlong ia kane ka jingiaid paidbah ka long ruh shibynta ka jingkop jong ka seng ia ki bor ka sorkar jylla Meghalaya kynthup naduh u Myntri Rangbah ka jylla bad ki kynhun myntri kiba don hapoh ki Regional Committee ban ia tai (Open Debate) halor ka jingpynbeit pud ha ka wat kaba nyngkong haba bun tylli ki jaka ki la shah pynhap sha ka Assam.
Ha kane ka jingïaid ha Patharkhmah la wan ban shimbynta da ki nongïalam ka HYC ba kynthup ïa u Bah Robertjune Kharjahrin, President, u Bah Roykupar Synrem, general secretary, u Bah Rhembor Saibon, Bah Donboklang Kharlyngdoh, kum ki vice president nalor kiwei kiwei.
Haba kren ha kane ka jingialang, ki nongkren ki la kynnoh ia ka sorkar ba kala lilam ia ki jaka jong ka Hima Khasi sha ki bor ka sorkar Assam khlemda burom shuh ruh wat ia ki jingpynshisha lyngba ki kot ki sla ba la don naduh ki mynbarim da ki nongialam ki Hima bad ki Raid kbad ruh ka jingsngew jong ki paidbah nongshong shnong khappud.
Ki la pynrem ruh ia ka jingshah kynnoh leh politics ia kane ka kam hadien ka jingpynlong jingialang paidbah ha Nongstoin.
Ki nongialam ka HYC ka la pynshai ba ka seng ka don ia la ka nongrim kaba skhem halor kane ka jingpyrshah ia ka MoU bad ia kane la nang pynskhem hadien ka jingmih jong ki nongmihkhmat paidbah ka Rambrai Konstituensi kiba la pynpaw ia ka jingangnud ba kito ki jaka kiba la shah pynhap sha Assam dei ban pynphai biang sha Meghalaya.
U Samla Roykupar Synrem haba kren sha ki lad pathai khubor, u la pynrem jur ia ka sorkar jylla kaba la shukor ia ki paidbah da kaba kam ba ia kane ka jingpynbeit pud ha ka wat ba nyngkong la pyndep katkum ka kaiphod jong u snem 2011.
“Ka jingshisha kam shem long kumta, namar katkum ka RTI ba la ioh da ka seng la paw shai ba ka Sector 6 ha Bakhlapara ha Ri Bhoi District la pynpaw ba ki shnong ki thaw ha kane ka Sector ki dang dei ban hap sha ka Meghalaya hynrei ka sorkar jylla ka la lilam pynban ia ka shnong Lyngkhung bad Jimbrigoan sha ka Assam”, ula ong.
Ki Nongialam ka HYC ki la dawa ba ka sorkar jylla ka dei ban khmih bniah biang ia ka MoU ba la ia soi bad ka Assam namar ba wat ia ka Constitution ka Ri India la lah ban pynkylla da ki spah sien balei ym lah ia ka MoU.
Kila pynkynmaw ia ka sorkar ba ka dei ka pynthikna ba ka jingpynbeit pud ha ka wat kaba ar kam dei shuh ban bakla kumba la jia ha ka wat kaba nyngkong khamtam ban burom bad kheiñkor ia ka jingshisha katkum ki kot ki sla bad ka jingsngew jong ki nongshong shnong ha ki thaiñ khappud.
