Shillong, Lber 15 : Ka jingbym lah ka Tnad Excise ban lum ia ka khajna excise duty kala lam sha ka jingduna ha ka jinglum ia kane ka khajna haduh T.14.58 klur bad ka CAG kala ai jingmut ban tohkit bniah ia ka jingleh bakla bad pyntreikam pyrrkhing bha ia ki jingpynbna (notification) ka Sorkar haba iadei bad ka dor jong ka khajna.
Haba leh audit ia ki kot ki sla ba iadei bad u Superintendent of Excise (SE), Tura hapdeng u Iaiong 2018 haduh u Lber 2019, la lap ba ka Tnad ka khlem lum ia ka excise duty kat kum ka dor bala buh, bad kane kala lam sha ka jingduna ha ka jinglum ia ka khajna haduh T.14.58 klur, ong ka CAG ha ka kaiphod halor ka jingioh lum pisa ka Sorkar jong u snem ba kut ha ka 31 tarik Lber, 2023.
Na ka excise duty baroh lang kaba dei ban siew, kaba long T.41.90 klur, ka khajna bala lum na ki lai tylli ki Bonded Warehouse (M/s Hill View Bonded Warehouse, Araimile,West Garo Hills, M/s Gloria Bonded Warehouse, Tura bad M/s Tura Bonded Warehouse) ka long T.27.32 klur, kumta, kala don ka jingduna ba T.14.58 klur (35%).
“Ia kane ka jingbym iahap la pyntip sha u Superintendent of Excise, Tura ha u Jylliew 2020 bad kumjuh ruh sha ka Sorkar ha u Nailur 2023” kala ong.
Ha u Nohprah 2023, u Commissioner of Excise, Meghalaya ula phah ia ka jingthoh ba pan ia ka jubab na kine ki warehouse kiba siew una ia ka khajna.
Nalor kane, u Superintendent of Excise, Tura ula pynmih ia ka hukum ban siew ia ka pisa ba duba sha ki Bonded Warehouse bala jer haneng bad ruh sha u Officer-in-charge ha u Kyllalyngkot 2024.
Ia ki jingtip ba bniah halor ka jinglum ia ka pisa ba duna ym pat ai jingtip satia ban leh audit (Iaiong 2024).
Ka CAG kala ai jingmut ba dei ban pynlong ia ka jingtohkit kaba bniah halor kine ki jingleh bakla bad ban pyntreikam pyrrkhing bha ia ki jingpynbna jong ka Sorkar Jylla haba iadei bad ka dor jong ka khajna.
 ka Sorkar haba iadei bad ka dor jong ka khajna.){kind=link}