Shillong, Lber 13: Ka khubor ba la ioh dier por na ki Pulit ka iathuh ba ka kali jong ka MDC ka VPP na Malki- Laitumkhrah Kong Deity Majaw, kala hap sha khap nala ha Ri-Bhoi District bad shem ba ka kali kala dap da ki Tyndong beer (jingdih buaid).
Ka khubor Pulit ka iathuh ba kane ka jingjia kala jia ha ka 8 tarik Lber ha ka por kumba 11 baje mynmiet ha surok NH-6 ha Shnong Quinine, Ri-Bhoi District.
Kane ka kali ka dei ka Grand i10 kaba don u nombor ML05-S-1130.
La iathuh ba ia kane ka kali la niah da u Bah Aldoly Mawthoh ba na Malki Pdenge Shnong, Shillong bad ka dei kaba dang wan na Guwahati sha Shillong.
Ki Pulit ki iathuh ba ka MDC ka Malki- Laitumkhrah Kong Deity Majaw bad uwei pat bah Jepry Pohlong ba Malki Pdengshnong, kila mynsaw ha kane ka jingjia.
Ia kine ki arngut la pynkit noh da ka Ambulance sha Bethany Hospital, Nongpoh hashuwa ban poi ki Pulit ha ka jaka ba aksiden.
La iathuh ba ia kine ki ba mynsaw la pynkit noh sha Appolo hospital, Guwahati ban ioh ia ka jingsumar ba paka.
Lah ban kdew hangne, ka Kong Deity Majaw ka dei kaba bat ruh ia ka kam Executive Meber (EM) ha ka Executive Committee ka VPP ha Khasi Hills Autonomous District Council (KHADC) bad ka khmih ia ka Tnad Law (Ain).
Ia ka kali kaba don bad bun tylli ki Tyndong beer la kit noh sha Nongpoh Police Station.
.){kind=link}