Shillong, Lber 11: Ka jingkynrei jong ka jingkhaii droks kala nang kiew ha ki bynta jong ka jaka ri thor kaba don ha ka thain jong ka West Garo Hills.
Ia kane la pyntip da u Myntri ka tnad Social Welfare u Bah Paul Lyngdoh ha ka jingwanrah ia ka jubab hapoh ka iing dorbar thawain ka jylla ha ka sngi Baar.
U Bah Paul Lyngdoh ula ong kiba ngop droks kala jur bha hapdeng jong ki khynnah samla ka West Garo Hills District bad kumta ki nongkhaii bad nongdie droks kila jur bha ha ki jaka ri thor bad kito kiba marjan bad ka ri (Bangladesh) ruh kala jur bha namar ba kane ka thain kadei ka thain kaba iajan bha bad ka jylla Assam and West Bengal (lyngba ka Wah Brahmaputra) bad ka jingjan bad ka ri Bangladesh.
Ula ong, ba naduh u bnai Kyllalyngkot haduh mynta, la lap ia kawei ka jingjia bad ka jingpyndonkam droks bad la rejistar case ha ki jaka ri thor jong ka West Garo Hills district ha Tillapara Bongarpar, Tikrikilla bad ia kane ka case la rejistar ha Tikrikilla Police Station hapoh ki kyndon jongka NDPS Act, 1985.
U Myntri ula iathuh shuh shuh ba la thaw ia ka Anti Narcotic Task Force (ANTF) ha ka District ban iakhun pyrshah ia ka jingkhaii droks bad kiwei kiwei ki jingjia kiba iadei bad ka NDPS hapoh ka District.
Ula iathuh ba kala don ka Addiction Treatment Facility ha Tura Civil Hospital na ka bynta kito kiba la shah ktah na ka jingdih droks. Ia kane ka jaka ai jingsumar la kyrshan da ka Ministry of Social Justice and Empowerment jong ka Sorkar India.
