Shillong, Lber 05: U Myntri Rangbah ka jylla u Conrad K. Sangma hynne ka sngi Balang ula ong ba palat T.3,654 Klur na ka bynta ka pule puthi ha ka bhah tyngka jong une u snem, kaba kynthup ia ka T. 2,770 Klur na ka State Resources.
“Ha ka ba T.1,403 Klur na ka bynta ka Grant-in-aid tulop ia ki skul bad T.170 Klur na ka bynta ban tei ia ki jingtei” ula ong.
“Ha ka wat kaba thymmai ban kyrshan ia ka Human Capital Project kaba T.150 Klur yn kynshew tyngka ban pynbha ia ki jingtei jong ki skul. Ban maramot bad ban tei thymmai ia ki 37 tylli ki Senior Secondary School bad ban tei ia ki 4 tylli ki DIET Hostel kidei kiba yn sa shimkhia” ula bynrap.
Ula pyntip ba ka jylla kala ioh T.162 Klur na ka bynta ki 750 tylli ki Digital Library lyngba ka Central Scheme da ka jingthmu ban ai ia ka jinghikai da ki kor Digital ia ki khynnah kynthei.
“Ka jingling jingman ha ka rukom pyniaid skul ha ka Meghalaya ka long kaba iar bha ha kaba ki don bunjait ki skul ryngkat bad ki rukom ioh jingkyrshan ki bapher. La sdang ia ka kam ban ithuh ia ki skul ki bym don satia ne kiba don hapoh jong ka shiphew ngut ki khynnah skul ha kaba na ka jingdon ia ki 14,582 tylli, kila don pat 2,475 tylli ki skul kiba hap ha katei ka kyrdan” ula ong.
Ula pyntip ba ka sorkar kala sdang pynwandur ia ka sienjam ban pynbeit ryntih ia ka rukom pyniaid ia ki skul kiba la kyrshan da ka sorkar.
U Myntri Rangbah ula pyntip ruh lyngba ka Mission Education, T.326 Klur la dep ban pyndonkam ha ki wat ban kyntiew, ban shna pynbha bad ban tei ia ki jingtei ha ki 2044 tylli ki skul sorkar.
“Baroh ki kam kiba dang sah ha ka wat kaba lai yn sa pyndep noh bad ia ka wat kaba saw jong ka Mission Education yn sa sdang pyntreikam noh ha u 2025-26. Ka jingpynleit jingmut ka long ban pynbiang 100 % ia ki jingdonkam ha baroh k iskul sorkar” ula ong.
