Shillong, Lber 04: Ka Meghalaya Power Distribution Corporation Limited (MePDCL) kala pynlut haduh T.1.48 Klur na ka bynta ban thied ia 6 tylli ki kali kiba pyndait ia ki jingkieng kiba la pynwandur kyrpang na ka bynta ban shna ia ki waiar elektrik kiba don shajrong bha bad ha kino kino ki jaka.
Kitei ki kali kin iarap shibun ha kaban pynkloi ia ki kam ki jam ban ai jingshakri bad ban pynduna ia ka por jong ka jingbym don ia ka bording elektrik.
Haduh mynta, ka MePDCL kala pyndonkam da ki kali ki bym don eiei bad ki jingkieng na ka bynta ban pyndiat ia ki waiar elektrik.
Ha kane ka kynti kaba mynta, kadei ha ka sien kaba nyngkong eh ba ka jylla kan don noh ia ki kali kiba kyrpang ia kaba la wanrah da ka MePDCL hapoh ka Meghalaya Power Distribution Sector Improvement Project ia kaba la bei tyngka da ka Externally Aided Project (EAP) jong ka Asian Development Bank, la pynpaw katei ka tnad ha ka kyrwoh khubor hynne ka sngi Baar.
Ka jinglut baroh ha katei ka project jong ka ADB ka long T.1225.74 Klur kaba kynthup kham bun ia ka jingtei ia ki 24 tylli ki Sub Station kiba thymmai, ka jingsdang pynbha ia ki 45 tylli ki Sub Station kiba la don lypa, u 617 Ct Km jong u sainar elektrik na ka bynta ka 33 KV, ka jingpynbha ia ka 295 Ct Km u sainar elektrik jongka 33 KV uba la don lypa, u 531 Ct Km u sainar elektrik jong ka 11 KV kaba thymmai, ka jingshna pynbha ia u 188 Ct Km u sainar elektrik jongka 11 KV kaba la don lypa, ka jingpyndait ia ki 1.80 lak tylli ki Smart Meter. Ka jingpyntrei ia kane ka kam baroh kala kot sha ka 62%.
Ka MePDCL kadei kaba shim halade marwei ia ka jingkitkhlieh ban pynbiang ia ka bording kaba biang sha ki paidbah kiba pyndonkam ha ka jylla Meghalaya.KIi don kumba 7,00,000 ki nongpyndonkam ia ka bording kynthup ia ki karkhana ki shaniah ha ka MePDCL ba kan ai iaka bording kaba baroh 24 kynta.
Ban pynbiang iaka bording khlem kano kano ka jingthud ha ka por mynsngi bad mynmiet kadei ka kam kaba khraw ia ka MePDCL khamtam eh ha ka por ba ka duna um. Ka jingsam ia ka bording ha ki jaka kiba iar jong ka jylla bunsien kala mad ia ki jingeh ha ka aiom lyiur. Kumta ban leh ia ki kam maramot bad pynbha ia ki sainar elektrik ha ka por kaba lyngkot bha ka long kaba eh shibun.
