Shillong, Rymphang 28 : Ki Pulit ka Assam kila rah mynta ia u Chancellor ka University of Science & Technology Mahbubul Haque sha Dispur Police Station ban tohkit da ki Heh Pulit.
Ia u Mahbubul la kem da ki Pulit ka Sribhumi Police Station ha ka 21 tarik Rymphang. La ong ba ia u Mahbubul ka rah sha Dispur ban tohkit da ki Heh Ophisar kynthup u Deputy Commissioner of Police (DCP) Crime, uba la poi ha kane ka thanad ban peit ia ka jingtohkit.
Halor kane ka jingjia, kiba bun ki samla pule kynthup ki Nonghikai ka USTM kila ialeit sha Dispur Police Station bad pyrshang ban iakynduh ia u Mahbubul hynrei ki Pulit kim shym la ailad satia ia ki ba kin iakynduh.
Hadien ka jingtohkit, ki Pulit kila ialam noh ia u Mahbubul Hoque sha ka iingsah jong u ha Guwahati ban pynlong ia ka jingkhynra.
