Shillong, Nailar 29: Ki Nongtrei Casual ka Meghalaya Energy Corporation Limited (MeECL) hynne ka sngi nyngkong, kila sdang ia ka wat ba nyngkong jong ka jingiakhih balai sngi da kaba deng lama iong ban dawa ia ka Sorkar Jylla ba kan thungkam pura noh ia ki bad ban siew lut noh ia ka arear ba dang pynsahteng.
Ia kane ka jingiakhih bala pynlong hapoh ka lama jong ka MeECL Progressive Workers Union (MePWU) la kyrshan ruh da ka Coordination Committee of Registered MeECL (Employees) Associations and Unions (CCORMAU).
“Ngim banse ban jam shakhmat bad ka wat jingiakhih kaba ar da kaba shongkyllain myngor naduh ka 5 tarik Nailur haduh ka 16 tarik, lada ka Sorkar ka leh mynthi ia ki jingdawa jong ngi” ong u President ka MePWU haba iakren bad ki nongthoh khubor.
Kat kum ka jingong jong u, ki don palar 2009 ngut ki nongtrei casual kiba la tei ha MeECL mynta la palat 20-30 snem.
U President ka CCORMAU PK Shullet ula ong ba ka Sorkar Jylla bad ki bor pyniaid ka MeECL ki hap ban don ia ka lynti iaid ne road map ha ka ban pynbeit ia ki jingeh jong ki nongtrei casual jong ka Corporation.
“Ka lynti ban pynbeit ka don hynrei ka jingkylli hi ka long la ki don ne em ka mon ban pynbeit ia kine ki jingeh”ula ong haba pynpaw “ka jingeh hi ka dei kaba lah ban weng da kaba pynkiew ia ka bai bording”.
Ha kajuh ka por, u Vice President ka CCORMAU Bah Arju Dkhar ula kyntu ia ka Sorkar Jylla bad ia ki bor khmih ka MeECL ban khot iakren noh mardor ia ka MePWU bad ban pynbiej ia ki jingeh jong ki ha ka miej iakren.
Une u Nongialam ka CCORMAU ula dawa ruh ia ka borkhmih ban pyllait noh ia ka arrear ba dang sahteng jong ki nongtrei Contract naduh u snem 2018 bad ki nongtrei ba pura naduh u snem 2015.
