Nongpoh, Nailar 29: Ka seng Hynniewtrep Youth Council (HYC) Ri Bhoi District, ka la dawa na ka sorkar jylla ba ka dei ban khang noh shipor ia ka jingwanrah sniang nabar, namar ki don ki sniang na shabar ka jylla, kiba don ia ka jingpang kaba la tip kum ka African Swine Fever (ASF).
Kane ka seng kala buh ia kane ka jingdawa halor ka jingioh pdiang ia ki ujor na ki Nongri Sniang ka District kiba la pyntip ia ka jingjur ka jingwan tuid ki sniang na shabar ka Jylla kiba khlem da khmih biah ia ka koit ka khiah jong ki, kaba pynsuba jur ruh ba ki lah ban don ia ka jingpang Swine Flu.
“Ka jingwan tuid ki sniang na shabar ka Jylla khlem da don kano kano ka jingkhmih ia ka koit ka khiah ka buh jingma shikat dei eh ia ki nongri sniang namar kin sa don ki sniang ki ban iabit jingpang na kine ki sniang ba wan nabar” ong I Bah Hercules Suting, General Secretary ka HYC.
Kat kum ka jingong jong u, ka daw kaba la pynlong ia ka seng ba kan pyrshah ia katei ka jingwanrah sniang na shabar jylla, ka dei hadien ba ki la ioh jingtip ba ia kitei ki sniang la wanrah na ki jylla ba ki sniang ki don ia ka jingpang African Swine Fever (ASF).
Katkum ka jingiathuh da utei u nongialam ka HYC, la ong ba kiba bun na kitei ki sniang kiba la bamdoh ha ka jylla, ki dei kiba wan na ka jylla Punjab, kaba dei ruh ka jylla kaba bun ki sniang ki la shah ktah eh ha ka jingpang ASF.
Nalorkata, kitei ki sniang kiba la wanrah na kiwei ki jylla, ki hap iaid lyngba ka jylla Assam, ha kaba wat ha Assam ruh, ki la don shibun ki jaka, kaba ki sniang ki la shah ktah eh ha ka jingpang ASF, la pynpaw utei u nongialam ka HYC.
Namar kata, ban shngain ki nongbam don sniang bad kumjuh ruh ia ki nongri sniang kiba don hapoh ka jylla, na ka liang ka seng ka dawa na ka sorkar ba ia mynta shipor ba ka dei ban khang shisyndon ia ka jingwanrah ia ki sniang na shabar hapoh ka jylla.
