Shillong, Nailar 29 : Ka Iingkashari Meghalaya High Court hynne ka sngi nyngkong, kala pynwai noh ia ka mukotduma Public Interest Litigation (PIL) bala mudui da u National Spokeperson ka AITC Saket Gakhale hadien ka jingshem ba kam shym la don satia kano kano ka jingot bording jong ka MeECL ha kawei ka shnong.
Ka Iingkashari kala ong ruh ba kane ka mudui ka dei kaba la ujor halor ka nongrim ba ka dei naka bynta ka bha ka miat jong u paidbah hynrei na kaei kaba paw ka long ba ka elekshon ka dei kaba la don hakhmut.
U Gokhale ha ka PIL ula kynnoh baka MeECL bad ka MePDCL kila ot ia ka bording jong kawei ka shnong halor ka nongrim ba ki nongshongshnong jong kane ka shnong ki khlem siew satia ia ka bai bording.
U Advocate General ka Jylla haba iasaid naka bynta ka MeECL bad MePDCL kynthup ka Jylla, ula pyntip ba kam shym la don satia kaba kum katei ka jingkynnoh kumba la mudui da une u Nongialam ka AITC.
Kat kum ka jingong u Nongshah mudui, ki transformer ha kylleng ki jaka ka South Garo Hills District kynthup ka Kalibari, kila julor na ka jingpom pyrkhat lane ki sniew na kiwei pat ki daw bad ki donkam ban maramot bad bujli thymmai noh.’
Ka sorkar Jylla ka pyntip ba ka kam ban maramot bad bujli ka lah ban shimpor hynrei ha kiba bun ki jaka, ia ki transformer la dep ban maramot lane bujli da ki transformer ba thymmai bad ka jingsam bording kala iaid biang kumba ju long ha kine ki Shnong.
