Nongstoin, Rymphang 21: Ka jingthep vote sha ka Khasi Hills Autonomous District Council ha West Khasi Hills, ka la iaid beit iaid ryntih naduh ka por mynstep haduh da kut ka por thep vote.
Katkum u Bah V.Swer Additional District Magistrate u la iathuh ba ka jingthep vote naduh mynstep haduh ka por 4 baje janmiet kumba la dep buh por, ka la long kaba iaid beit bad ryntih ha man la ki polling station kiba hap ha ki lai constituency jong ka West Khasi Hills District.
U la ong ba tad haduh ka por 7 baje janmiet la ioh jingkhein antad ba na Mawshynrut, ka jingpoi ki nongthep vote ka long 72.52 percent, Rambrai Jyrngam Constituency ka long 77.08 percent bad Nongstoin Constituency ka long 65.75 percent.
U la ong ruh ba kane ka long tang ka jingkhein antad, namar ki bun ki polling station kiba don jngai na Nongstoin District Head Quarter, khamtam kito kiba don sha ki jaka khappud, kiba lehse kin poi slem bad ka jingkhein kan ym pat long kaba biang tad ynda la poi lut baroh.
Kumjuh ruh na ka liang u Bah Nongbri Additional Deputy Commissioner ka Eastern West Khasi Hills, u la ong ba tad haduh ka por 7 baje janmiet, ka jingpoi ki nongthep vote ha Mawthadraishan ka long haduh kumba 80 percent. Katba ha Mairang ka jingpoi ki nongthep vote ka long kumba 81 percent ei ei .
Kine ki bor District ki la kren shai ruh ba dei tad haduh ka sngi saitjain 22 tarik ba yn lah ban pynthikna ia ka jingpoi ki nongthep vote ha ki san Constituency jong ki ar District.
