Kot 60% ka jingthep vote ha KHADC, 70% ha JHADC haduh 3 baje janmiet
Shillong, Rymphang 21 : Ka Tnad District Council Affairs (DCA) ha ka sngi Thohdieng, kala hukum ban pynlong biang da kawei ia ka jingthep vote ha ki saw tylli ki Polling Station ha East Jaintia Hills hadien ba ki briew bym lah ban ithuh, kila leit rung jubor bad pynjulor ia ki Electronic Voting Machine (EVM).
Ia kane ka jingthep vote da kawei yn pynlong lashai ka sngi Saitjain naduh ka por 7 baje mynstep haduh ka por 4 baje janmiet bad la buh ia ka bor pahara kaba khlain bha.
Kat haduh ka por 3 baje janmiet, ka jingpoi ki nongthep vote ban thep ia ki vote jong ki kala kot 60% ha KHADC katba ha JHADC kala kot ia ka 70%.
Haba pynbna ia kane ka hukum jong ka Tnad, u Commissioner & Secretary ka tnad DCA Bah Cyril Diengdoh ula ong “ka DCA kala hukum ban thep vote biang da kawei ha ki saw tylli ki Polling Station jong ki artylli ki constituency ha EJH. Kane ka jingiathep vote da kawei kan long lashai ka sngi naduh 7 baje mynstep haduh 4 baje janmiet”.
Ki Polling Statoin, ki ban hap thep vote da kawei ki kynthup ia ka Wapung Skur A bad Wapung Skur B kiba hap hapoh ka Musniang-Rangad Constituency bad ka Bataw A bad Bataw B kiba hap hapoh ka Bataw-Lakadong constituency. Baroh kine ki 4 tylli ki polling station ki dei kiba la ithuh kum ki constituency kiba lah ban mih jingkulmar bad don jingma bha.
U Bah Cyril ula ong ba ia kane ka rai la shim hadien ka kaiphod bala ioh pdiang ba ki don ki briew ki bym ithuh, kila leit rung jubor ha kine ki 4tylli ki polling station bad pynjulor ia ki EVM.
Kat kum ka jingong jong u, ia ka daw ha lyndet jong kane ka jingthombor ha kine ki polling station yn hap ban tohkit ban lap.
“Ia mynta namar ka jingjulor ki EVM, ka rule ka shah ia ngi ban pynlong da kawei ka jingthep vote kat kum ka rule 143.B. Lada don kano kano ka jingkulmar bad jingjulor ki EVM, ngi la hukum ban thep vote da kawei na ka bynta ka elekshon kaba khuid ba suba bad ka jingiathep vote kan sdang lashai ka sngi” ula ong.
Haba kylli, u Bah Diengdoh ula ong “Ki bor pahara kila don ha kitei ki Polling Station hynrei kane ka dei ka kynhun ki paid bhur bad ki paidbhur kila thom ia ki bor pahara bad ia ki nongpyniaid elekshon ruh la hap ban pynkynriah marmar sha ki medical centre ba marjan namar ba kila sheptieng. Hynrei, ki bor District kila shimkhia ia ka kam bad kam shym la don mano manor uh ba mynsaw. Baroh ki briew jong ngi kim shym la jia eiei lait noh tang ka jingjulor ki EVM”.
Nalorkane, une u Heh ka DCA u pyntip ba u Deputy Commissioner ba u SP ka District, kila shong bishar kam halor ka jingpynkhreh baroh ban pynlong ia ka jingthep vote da kawei ha kine ki saw tylli ki Polling Station.
Haba kylli la kala don ka jingujor ejahar, u Bah Cyril ula ong ba u DC un sa shim ia ki sienjam kiba donkam.
Ha kajuh ka por, u Commissioner & Secretary u pyntip ba ka jingthep vote kat haduh ka por 3 baje kala kot 60% ha KHADC bad 70 % ha JHADC.
“Ngi dang lum jingkhein mynta ia ki vote bala thep ha baroh ki constituency bad ngin sa pyntip kham hadien “ ula ong.
