Agartala, Nailar 29 : U president ka BJP, u JP Nadda ula wan poi ha Tripura hynnin ka sngi U Blei ha ka jingwan jngoh ba ar sngi ka jong u ia kane ka jylla na ka bynta ban pynkhreh ha kaba iadei bad ka ilekshon assembly ka ban long ha kine ki hynriew bnai ki ban wan.
Hadien ba ula wan poi ha Agartala, u la pynlong ia ki katto katne ki jingialang hapoh ka guest house ka jylla ha ryngkat ki nongkitkam jong ka party, ki nongialam jong ki kynhun seng ba hakhmat, ki myntri sorkar, dkhot ka Lok Sabha, MLA bad ki dkhot commitee ba hakhmat jong ka seng BJP.
Na ka liang u Myntri Rangbah (CM) ka Tripura, u Manik Saha, u president ka party ha ka jylla, u Rajiv Bhattacharjee, u myntri ka sorkar pdeng, u Pratima Bhowmik, u CM barim u Biplab Kumar Deb, ki nongkhmih bniah ka sorkar pdeng kiba kynthup ia u Vinod Sonkar ruh kila iashim bynta ha ki jingialang ba la pynlong kawei hadien kawei pat.
U Nadda un pynlong ruh la ka jong ka jingialang bad ki dkhot jong ka Tripura Tribal Areas Autonomous District Council (TTAADC), ki nongialam jong ki trai shnong kumjuh bad ki MLA bad nongialam jong ka kynhun synrop BJP -Indigenous People’s Front of Tripura (IPFT), ka kynhun kaba khlainbor jong ki trai shnong riewlum jong ka thain.
Kham hashwa, hadien ba ula wan poi hapoh Maharaja Bir Bikram airport ha Agartala, une u president ka BJP ha ryngkat ka jingsynran lang da u CM ka Tripura, u president ka partyka jylla lem bad kiwei pat ki nongialam kila ia sngap ruh ia ka jingkren jong u Myntri Rangbahduh (PM) Narendra Modi ha ka prokram ‘Mann-Ki-Baat’ hapoh ka kad liengsuin.
U Nadda ula ioh ia ka jingpdiang burom kaba heh bha lyngba ki spah ngut ki nongialam jong ka BJP kumjuh ki nongtrei ka party hapoh ka kad liengsuin bad ruh ha ka lynti ka jong u shapoh ka guest house ha ki bynta ba pajih na ka sorbah.
U nongialam ba la rim ka BJP u la ong ba u Nadda ha kane ka jingwan jngoh ba ar sngi, kata hynnin ka sngi u Blei bad mynta ka sngi Nyngkong, un pynlong haduh kumba hynriew tylli ki jingialang bad ruh un aijingkren ha ka jingialang paidbah hapoh ka headquarter jong ka TTAADC ha Khwumlung, kumba 20 km na Agartala mynta ka sngi Nyngkong.
U Nadda ia kaba la synran lang da ka kurim jong u, kin leit ruh sha Udaipur ha ka thain shathie ka Tripura na ka bynta ka jingleh niam puja hapoh Tripureshwari temple.
