Shillong, Feb 11: Ka Mawlai SC kala pynrem da 6-0 ia ka Nangkiew Irat ha ka OC Blue Shillong Premier League 2024 kaba la long hynne ka sngi Baar ha SSA Stadium, First Ground, Polo.
Katba ha ka jingiakhun ha ka por mynstep, ka Sawmer SC kala pynrem ia ka Nongrim Hills da 4-1.
U Kevin Rymbai ula thep ia ka kol ha ka 47, 58 bad 90’+3 minit kaba ula ioh lyngba ka Penalty kaba ioh syndon ia ka Hat-trick ka jongu na ka bynta ka Mawlai. Kiwei pat kiba la thep kol ki kynthup ia u Overkindness L Mawnai ha ka 42 minit, u Banraplang Pyngrope ha ka 51 minit bad u Donlad Diengdoh ha ka 90’+1.
Kane ka jingjop kala pynlong ia ka Mawlai ban ioh 32 point bad ban knieh biang ia ka kyrdan kaba nyngkong na ka Shillong Lajong FC kaba la ioh 29 point.
Ka Sawmer kala ioh khur ia ka jingjop bad kiew sha ka kyrdan kaba 7 da kaba knieh na ka Nongrim Hills.
U Bickyson Kharkongor ula thep ia ka kol ha ka 25 minit, u Aibanraplang Dohling ula thep ha ka 31 minit, u Shanmeiaki Warlarpih ha ka 42 minit bad u Diego Khyriem ula thep ia ka kol ha ka 59 minit kaba la pynthikna ia ka Sawmer ban khur ia ka jingjop
Katba u Alem Khongwir ula thep ia ka kol ha ka 87 minit na ka bynta ka Nongrim Hills.
Ka Sawmer mynta kala don 15 point bad ka Nongrim Hills kala don 14 point bad kine baroh ar ki bud nadien jong ka Nangkiew Irat kaba don 16 point.
Naduh ba sdang ka kylla step, ka Mawlai kala ialehkai bha hynrei ka Nangkiew Irat kam shym la lah ban thaw pyrthei eiei ban ioh thep kol watla kala ioh ia katto katne tylli ki kabu.
Ha ka kylla miet ruh ka Mawlai kala bteng ban thep kol da ka jingialehkai bha ki rang kiba ialehkai shakhmat hynrei ka Nangkiew Irat kam shym la lah satia ban ioh thep kol wat haduh ban da kut ka jingiakhun.
Ka Nangkiew kala iakhun 6 sien bad kam shym la lah ban jop hynrei kala iakhiad pat haduh 4 sien, katba ka Mawlai haduh mynta kam pat mad ia ka jingshah rem bad kadei ka kynhun ialehkai kaba nyngkong eh ban ioh khur haduh 10 sien ia ka jingjop.
Ka jingiakhun hapdeng ka Sawmer pyrshah ia ka Nongrim Hills ruh kala long kaba itynnad ha kaba naduh ka kylla step ki nongialehkai ka Sawmer kila ialehkai bha hynrei ha ka kylla miet ki nongialehkai kila ialehkai bha bad u Kevin Rymbai ula ioh syndon ia ka Hat-trick bad ka Sawmer kala pynjem khnap syndon ia ka Nongrim Hills kaba la ioh thep tang shi kol shwa ban kut ka jingiakhun.
Ha ka sngi Saitjain ka jingiakhun kan long hapdeng ka Rangdajied United FC pyrshah ia ka Langsning ha ka por 11 baje mynstep bad ha ka por 2:30 mynsngi ka jingiakhun kan long hapdeng ka Nongthymmai SC pyrshah ia ka Sawmer.
