Shillong, Rymphang 11: Ka IORA Ecological Solution hynne ka sngi kala pynpaw ka jingangnud ban bteng biang iaka jingiatreilang bad ka Sorkar Jylla lem bad baroh 3 tylli ki District Council jong ka Jylla ban iarap ia ki paidbah lyngba ka Carbon Finance .
Ïa kane la pynpaw hi da u CEO ka IORA u Swapan Mehra hadien ka jingïalang bad u Caretaker ka KHADC u Bah Pyniaid Sing Syiem.
Haba kren sha ki lad pathai khubor u Swapan Mehra u la pyntip ba ki la ïatreilang bad ka Sorkar Meghalaya lem bad ki 3 tylli District Council kata ka KHADC, JHADC bad ka GHADC ban ai jingïarap ïa ki paid nongrep ha Meghalaya ban ïoh ïa ka dor kaba bha tam lyngba ka Carbon Finance haba die ia ki marrep.
U Swapan u la pyntip ba ka Company IORA ka don ka jingiatreilang bad ka Bank jong ki nongrep kaba heh tam ha ka pyrthei kaba don ha Netherland, ka Rabo Bank ban kyntiew ia kane ka prokram ha ka Jylla.
U la ong ba ka jingthmu ka dei ban pynmih pisa ia ka Carbon kaba nyngkong jong ki ha ki 2-3 bnai ban wan.
“Ka jaka kala don lypa kumba 19 hajar hectare bad kumba 9000 ngut ki nongrep ha ka Digital Platform jong ki bad ka thong ka long ban rah ia kane sha ka 100 hajar hectare khnang ba ki nongrep ki lah ban kamai pisa lyngba ka Carbon Finance” ong u Swapan.
U Swapan u la iathuh ruh ba mynta ka kynti, ka IORA ka iareilang bad kiwei pat ki nongbei tyngka bad ka Company na USA kata ka USDC bad kiwei ki Bank kiba thrang ban bei tyngka ha Meghalaya.
U Caretaker ka KHADC u Bah Pyniaid Sing Syiem u la pyntip ba ka District Council ka la iatreilang bad ka IORA Ecological Solutions la shisnem mynta ban pyntreikam ia ka Agro Forestry Carbon Finance Project.
U Bah Pyniaid u la ong ba kane ka Company ka la ai jingiarap shibun ban pynsngewthuh bad ban ai ki jinghikai na ka bynta ki nongrep halor kumno ban pynneh pynsah ia ka mariang bad khamtam eh ba ki nongrep kin ioh ka jingmyntoi lyngba ka Payment for Ecosystem Services Scheme (PES) kaba la pyntreikam da ka Sorkar Jylla
U la ong ba ka KHADC ka thmu ban pyniar ia ka jingiatreilang bad ka International Finance Development kaba don ha USA.
Lah ban kdew ba ka Payment for Ecosystem Services Scheme ka ai jingmyntoi lyngba ka jingkyrshan pisa kaba T.8 hajar shi hektar ha ka shisnem na ka bynta san snem.
Hapoh kane ka skhim, la ai khusnam kaba T. 5,000 shi hectare ha ka shisnem sha kito ki khlaw kiba la Register kum ki Community Reserves ha ka tnad khlaw bad T.2,000 shi hectare ha ka shisnem sha kito kiba don ka khlaw kaba rben bha lane kiba la ithuh tynrai kum ki khlaw kyntang kane ki Sacred Grove.
