Shillong, Rymphang 10 : U Myntri ka Tnad Border Area Development Rakkam A Sangma ha ka sngi Nyngkong, ula pyntip ba ka Sorkar Jylla kala thoh sha ka Sorkar Pdeng ba kyrpad ban pynbteng biang ia ka Border Area Development Programme ha ka Jylla.
Haba kren sha ki lad pathai khubor, u Rakkam ula ong ba ka BAD programme ka dei kaba treikam la bun bun snem hynrei naduh u snem 2021 ter ter, ia kane ka prokram la pynsangeh noh da ka Sorkar India.
“Ngi la phah jingthoh bad kyrpad ia ka Sorkar India ba kan pyrkhat biang ia ka rai ban pynbteng ia kane kajuh ka prokram” ula ong.
Kat kum ka jingong jong u, kane ka prokram kala iarap bha ban kyntiew ia ki jingtei ha ki jaka khappud la ka dei ki Iingskul, ki hospital, ki surok bad ki jingkieng.
Ula ong ba mynta ka Inter-State programme ban shna ia ki surok, Iingdorbar shnong, ki iingskul bad kiwei kiwei ki dang iai bteng.
Haba kylli, u Rakkam ula ong “Ka dei ka prokram jong ka Sorkar India. Ka dei kaba iabhah 90:10 ka jingpynlut. La pynsangeh ia ka namar ki daw bapher bapher. Ngi la ai jingthoh sha ka Sorkar India bad ngi la kyrpad ba kan pynsdang biang ia ka prokram”.
U Rakkam ula pynpaw pat ba ka scholarship na ka bynta ki samla pule jong ki shnong khappud kan dang iai bteng beit kumba ka ju long.
