Nongpoh, Rymphang 05 : U President ka National Peoples’ Party (NPP) ha Meghalaya bad Symbud Myntri Rangbah ka Jylla Bah Prestone Tynsong, ula ong ba ka NPP kam don por ban jubab ia ki jingkynnoh ba laiphew jait jong ki Liang Pyrshah ne kynhun bapher bapher namar ka bunkam ban trei ha ka ban wanrah ia ki kam pynroi sha baroh ki shnong ki thaw bad kyntiew ia ka bha ka miat u paidbah bad ka Jylla.
U Bah Prestone ula kynthoh ia kane ha ka rynsan ialap elekshon hynne ka sngi Balang ha Umwang Them, Ri-Bhoi District, ban pan jingkyrshan ia ka kyrtong jong ka Party bad MDC barim ka KHADC Kong Rona Khymdeit kaba iakhun na Nongpoh Constituency.
U Bah Prestone ula ba ka Sorkar ba ialam ka NPP kala shah kawang ktieh na kat ki liang namar ka dei ka Sorkar kaba treikam bad kaba shakri hok ia u paidbah bad ia ka Jylla.
“Phi ki paidbah wat longkiba ngeit biej. Ki kynnoh ia ka NPP ba ka bamsap, ki kynnoh ba dei ka party High Level hynrei kim nud pat ban ujor sha ka ain namar kim don ia ki sakhi ban pynshisha. Balei ki tieng ban ujor sha ki bor ka Ain lada ki ne ki jingkynnoh ki dei kiba shisha. Kam don jingmut ban shu kynnoh bad shu heh tang ka tyngam” ula ong.
U Bah Prestone ula ong ba ka Sorkar ba ialam ka NPP ha kine ki 8 snem bala leit, kala wanrah ia ki Policy treikam bapher bapher kiba pynmyntoi ia man uwei pa uwei u nongshongshnong ka Jylla kynthup naduh ki nongrep, ki nongbylla sngi, ki nongniah kali bad ter ter.
U pyntip ba dang shen, ka Kynhun Myntri ka Sorkar kala rai ruh ban thaw noh ia ka Apex Cooperative Society ka ban kdup bad kyrshan ia baroh ki Cooperative Society bad ki Slef Help Group, ki Village Organisation lyngba ka jingairam ai shah ba kin lah ban sengkam ne pynheh ia ki kam ba ki trei khlem da bunkam shuh ban leit tynruh ia ki bank. U ong ba kane kan iarap ruh ha ka liang ka iohkam iohjam ia ki nongshongshnong ha kylleng ki jaka jong ka Jylla.
Haba pan jingkyrshan ia ka kyrtong, u Bah Prestone ula ong “Watla ka kong Rona Khymdeit kam pat jop ia ka elekshon MDC, hynrei kala trei shitom bha ban pyniajan ia u paidbah bad ka Sorkar ban ioh ia ki jingiarap bad ki kam pynroi. Katno tam kan long ka jingmyntoi ia ki paidbah lada ka jop kum ka MDC ka NPP ha kane ka elekshon ban wan”.
U Symbud Myntri Rangbah ula kren ruh halor ka surok hapoh ka thain bad pyntip b aka Sorkar kala dep ban mang ia ka song pisa bad kala dep ai ruh ia ka work order ban shna noh ia ka surok Nongpoh-Umden sha Sonapur kaba kot palat T.100 klur. U pyntip ba mar ia kut kane ka elekshon, ka tnad PWD kan sa sdang pyntrei noh shaid shaid ia kane ka surok na ka bynta ka jingmyntoi u paidbah ka thain.
Na ka liang ka Kong Rona Khymdeit, haba pan jingkyrshan na ki paidbah, kala iathuh, ba ka jied jong ka ia ka NPP ka dei kaba la pynshong nongrim na ka jingtreikam jong kane ka party bad ka jinglah ban wanrah ia ki jingkylla hapoh ka Jylla nalor ki kam pynroi kiba la rung mynta sha man ki kyndong kynshrot jong ka Jylla.
Ha kane ka sngi, ki Nongialam ka NPP ba kynthup ia u Nongaiktien Bah HM Shangpiang, u President ka NPP na Ri-Bhoi Bah Clement Mawlong nalor kiwei kiwei, kila iahiar ruh sha ka shnong Mawmain ban pan jingkyrshan ia ka Kong Rona Khymdeit ba kan ioh kheit ia u soh ka jingjop ha kane ka elekshon ban wan.
