Shillong, Nailar 28 : Ka Hynniewtrep Achik National Movement (HANM), Political Wing, kala pyntip ba shen kan sa sdang ban leit ialap kylleng ki jaka jong ka Jylla halor ka jingdonkam ban ioh noh ia ka kam sain pyrthei kaba khuid ha Jylla Meghalaya.
Haba iakren bad ki nongthoh khubor, u President ka HANM Bah Lamphrang Kharbani ula ong ba ka Jylla Meghalaya kala rakhe mynta u snem ia ka jingdap 50 snem, hynrei ka Jylla ka dang duna bun bah ki kam pynroi bad ki ain ki ban iada ia ki nongshongshnong ka Jylla.
U Bah Lamphrang ula kynnoh ba ka Eleskhon ha Meghalaya kala kylla long kum kawei ka tamasa ha kaba ki nongthep vote kila shah pynbiej lai phew jait ha ki Kyrtong ne Political Party da kaba pynlong ia ki tamasa iaput iatem lem bad ka jingkhawai bad pyndih kyaid nalor kiwei kiwei.
“Ki paidbah ka Jylla ki dei ban pynkylla noh ia ka jingmut jingpyrkhat ym ban thep vote tang ban ioh pisa, ka bam bad kiwei kiwei ki jingdonkam shimet hynrei ki dei ban vote ia ki briew kiba lah ban trei na ka bynta ka bha ka miat u paidbah bad ka Jylla” ula ong.
U Bah Lamphrang ula kynnoh ba kat kum ki jingtip bala ioh na ki Dkhot ka HANM ha East Jaintia Hills, ki Political Party bad ki Kyrtong iakhun elekshon ha kine ki jaka kila sam T. 1 lak haduh T2. Lak ia kawei pa kawei ka Longiing ba kin ai vote ia ki ha ka elekshon MLA 2023”.
Ula ong ba kane ka kam ym tang ba ka long pyrshah ia ki kyndon jong ka Election Commission of India hynrei kam long ruh ka ban ai jingmyntoi ia ka Jylla namar kane kan pynshlur ia ki kyrtong ne Political Party ban pyndonkam bakla ia ki paidbah khap ia ki nongthep vote tang ba kin myntoi shimet.
“Ka Elekshon 2023 ka dang jngai bha, namar kata ka donkam ban pynsngewthuh ia ki nongthep vote ba kin jied noh mynta ka kynti ia ki Nongialam kiba lah ban trei na ka bynta ka jingbha jong ka Jylla, kum ka jingwanrah ia ki Policy bapher bapher kynthup ia ka Education Policy, Employment Policy bad ruh ban warah ia ki ain kiban iada ia ka Jylla kum ka ILP, pynkupbor ia ki Dorbar Shnong bad kiwei kiwei” ula ong.
U Bah Lamphrang ula kyntu ia ki paidbah ka Jylla ba kim dei shuh ban jied ia ki businessman hynrei ban jied ia ki briew kiba don ka jingkitkhlieh kiba don ka jingiohi jngai, ka nongrim, ka sap nongialam bad kiba la nang la stad.
