Shillong, Rymphang 5: U Myntri Rangbah ka jylla u Conrad K Sangma ha ka sngi Balang, u la pyllait paidbah ia ki e-Books jong ka CM Impact Meghalaya Class Readiness Program na ka bynta ban tei ia ki jingkieng hapdeng ki jingioh kyrdan (grades) na ka bynta ka jingjop kaba kham khraw.
Ha kane ka jingpyllait paidbah la donlang ruh u Chief Secretary ka Jylla bah D P Wahlang, u Commissioner & Secretary ka tnad pule puthi Vijay Mantri bad u chairman ka tnad MIDC James K Sangma.
Haba ai jingkren, u Myntri Rangbah u la ong ba ka sorkar ka la trei shitom ban pynkylla dur ïa ka tnat pule puthi la slem bha. “Ki don shibun ki jingeh ha ka liang ka pule puthi kiba ïadei bad ki nonghikai, ki jingtei, ka jingdon ki skul bapher bapher bad kiwei kiwei bad katba ngi dang ïakhun ïa kine ki jingeh ngi la pynleit jingmut ruh ban pynthikna ban pynbha ïa ka jingpass bha jong ki khynnah ha ka eksamin secondary bad kata ka la long ka mat ba kongsan na ka bynta jong ngi ban ïaid shakhmat,” u la ong.
U Myntri Rangbah u la pyntip ruh ba watla kala shim ia bun tylli ki buit treikam ban pynlong ia ka Meghalaya Class Readiness Programme kum ka sienjam ban kyntiew ïa ka jingpule ym tang ha ki kyrdan pule Secondary hynrei wat ha ka kyrdan primary bad upper primary.
U la pyntip ruh ba ka hap ban don ka jingkylla kaba ryntih ha ka jingpule bad ka jinghikai ha ka kamra klas hi. “Nga kyrmen ba da ki sienjam kum kine ngin don katto katne ka jingkylla ha ki kyrdan pule bapher bapher bad pyndap ïa ki jingduna bad ïarap ïa ngi ban pynurlong ïa ki thong kiba ngi la buh ha ka liang ka pule puthi,” u la ong.
Ka Meghalaya Class Readiness Programme ka dei ka jingthmu ban pynkylla dur ia kaba la shna na ka bynta ban pynkup bor ia ki khynnah skul bad ban pynkhlain ia ka pule puthi ha Jylla. Ka prokram ka thmu ban pyndap ia ki jingduna ha ka pule dang ba don mynta bad ban tei ia ki nongrim kiba skhem na ka bynta ka jingpule kaba pura da kaba pyndap ia ki jingduna ba kongsan bad ka jingmih kaba bha ha ki kyrdan pule bapher bapher jong ki khynnah skul.
Ka prokram ka dei kaba la pynwan dur na ka bynta ki Klas 1 haduh 10 ban pynthikna ba uwei pa uwei u khynnah un ïoh ïa ki sap kiba ki donkam ban kiew shaphrang. Ka Meghalaya Class Readiness Program ka dei ka prokram kaba saw taiew na ka bynta ki nonghikai jong baroh ki skul jong ka jylla bad ka jingiarap kaba lyngkot ba kin ioh ia ka jingpule kaba iaryngkat bad kaba bha na ka bynta baroh.
U Director, Directorate of School Education and Literate, u Swapnil Tembe u la pyntip ba ïa kane ka prokram la pynwandur na ka Vidya Pravesh module jong ka NCERT khnang ban ïarap ïa ki khynnah skul ba kin pynjanai ia ka jingioh kyrdan. “Ha ka taiew ba nyngkong baroh ki nonghikai naduh Class 1 haduh 10 kin leh ïa kane ka prokram ban ïarap ïa ki khynnah skul ban long kiba la pynkhreh iaka jinghikai bad ban ïarap ïa ki ba kin kiew na kawei ka kyrdan sha kawei pat,” u la bynrap.
 na ka bynta ka jingjop kaba kham khraw.){kind=link}