Shillong, Rymphang 01: U Myntri Rangbah ka Jylla Conrad K Sangma hynne ka sngi Saitjain, ula leit iuhkjat ha ka shnong Sawmer bad plie ia ka 1st Albera Choir Competition & food Fest hapoh ka Shnong.
Ia kane ka Choir Competition & Food fest la pynlong da ka Seng Rangbah Katholik Sawmer kum shibynta na ka jingrakhe ia ka Silver Jubilee ha Don Bosco Sunny Side, Sawmer, kaba la wan iashimbynta ruh da ki kynhun rwai Choir na ki Parish bapher bapher.
Shuwa kane, u Myntri Rangbah ula iakynduh bad iasyllok ruh bad ki dkhot ka Dorbar Shnong, ka Seng Kynthei bad Seng Samla ka Sawmer, kiba la pynpaw ia bun kiei kiei kiba iadei bad ki jingdonkam hapoh ka Shnong.
U Myntri Rangbah ula ong ba kine ki jingiasyllok ki phalang ia ka jingkut jingmut jong ka Sorkar ban iakren iakhana bad iasyllok bad ki paidbah ha ki shnong ki thaw bad kular ruh ba un sa khmih bad shimkhia ban leh eiei halor ki jingdonkam bad jingdawa jong ki nongshongshnong.
