Meghalaya State League | Pynkhreh ka Mawlai bad Shillong Lajong ban iaknieh ia ka nam lahduh

Shillong, Jan 31: Ka Mawlai bad ka Shillong Lajong kila pynkhreh ban iakhun ia ka final ban ioh rah ia ka nam lahduh jong ka 4th Meghalaya State League 2024 ka ban long ha ka sngi Saitjain ha Wahiajer Multipurpose Sports Complex, ha ka por 1 baje mynsngi.

Ka Mawlai bad ka Lajong ki dei ki kynhun ialehaki kiba la ioh rung napdeng ki 24 tylli ki Club kiba la iashimbynta haka MSL 2024 ba la pynlong da ka Meghalaya Football Association ryngkat ka jingkyrshan jong ka Tnad Sports and Youth Affairs ka jylla.

Kadei ka sien kaba nyngkong eh ia ka Mawlai ban ioh rung ha phainal mynta ka kynti bad ha u snem uba la dep, ka Mawlai kala duh ban rung sha ka phainal hadien ba kala shah pynrem noh ha ka Khliehmawlieh ha ka Semi Final.

Ka Lajong kala rah teng ia ka nam Lahduh jong ka MSL ha u snem 2019 hynrei ha u snem bala dep kala shah pynrem noh ha ka Rangdajied United ha ka semi final.

U Assistant Coach ka Lajong u Bah Milan Nongkhlaw ula ong, “Ngi lah pynkhreh bha naduh u snem ba la dep haduh kane ka kynti kaba mynta”

“Ha ka jingiakhun ha ka semi final pyrshah ia ka Rymbai Shkenshynriah, ngi lah ialehkai bha bad ki nongialehkai ki jong ngi kila ialehkai bha hynrei ka Mawlai kadei ka kynhun kaba tbit bha ha ka jylla. Ngi sngewthuh ia kata hynrei ngi lah long kiba la pynkhreh bha pat” ula ong.

U Assistant Coach ka Mawlai u Bah Teibor Dohling ula ong, “Ha ka sien kaba la dep ngim shim la ioh rung sha ka phainal hynrei mynta ka kynti ka kynhun kala pynkhreh bha bad ngi la long kiba la pynkhreh ban iakhun ia ka kynhun kaba khlain”.

Ula ong “Ki nongialehkai ki long lut kiba biang bha bad ki don ia ka jingthrang ban khur ia ka jingjop na ka bynta ka Club bad ia ka Shnong”.

Ki tiket na ka bynta ban peit ia katei ka phainal lah ban thied na katei ka jaka ba pynlong ia ka jingialehkai bad yn pyni ‘Live’ ruh ia kane ka jingiakhun ha ka Hello Meghalaya app.