Shillong Kyllalyngkot 31: Ki Pulit ka jylla hynne ka sngi Thohdieng kila pynmih ia ka jingbthah ba kyntu ia ki paidbah ba kim dei ban ngop ha ki jingpynbiej jong ki riewsniew kiba byrngem ban teh ban khum lyngba ki kor digital ne marmet (digital arrest/physical arrest) tang ban ioh dawa pisa na ki briew kiba lui lui.
U SP ka East Khasi Hill Bah Vivek Syiem ula pyntip ba kila don bun jait ki jingthok jingshukor pisa kiba la ujor ha kaba kala don ruh ka jingbyrngem ban teh ban khum ia ki briew kiba lui-lui bad la pynbud pat hadien kum ka jingdawa pisa kaba bun bah.
Ula iathuh ba kitei ki rukom dawa ki kynthup ia ka Parcel Interception ne ka jinglap ia ka song tiar, ha kaba ki briew ki ioh pdiang ia ka phone call kaba kam ba ka dei na ka FedEx ba la suba jur ia ka song ba ka don ia ki tiar kiba be-ain (droks ne ki tiar pynmynsaw) ia kaba kila lap bad ka dei kaba don bynta bad ka kyrteng bad ka jaka sah ka jongki. Kine ki riewsniew kila nang pynheh ia katei ka kam da kaba pyniasoh ia ki briew bad ki pulit/CBI/ED/NIA, kiba byrngem kylla ban kem lada ki briew kim treh ban ai ka jingiatreilang.
Ka jingdon bynta lang ki bahaiing ( Family Member Involvement) : Kine ki riewsniew ki lah ban kam ba u dkhot jong ka iing ula shah kem ne u donkti ha ki kam sniew. Ki dawa pisa mardor na ka bynta ban pyllait noh ia u dkhot jong ka iing khnang ba kin lait na kino kino ki jingshah ktah ha ka ain.
Ka jingpyndonkam bakla ia u Aadhaar ne Phone Number : Ki briew kiba la shah pynngop kila shah kynnoh ba kala don ka jingpyndonkam bakla ia u Aadhaar number ne u phone number na ka bynta ki kam sniew. Kine ki riewsniew ki thaw ia ka khana ba kila donkti ha ka kam sniew ban pyniaid thok ia ka pisa, ban khaii briew bad pynbor ia ki ba kidei ban siew ia ka jingdain kuna ban pyllait noh ia ka kyrteng ka jongki.
Ki jingkynnoh ba kila pynsaphriang ia kiei kiei kiba khlemrain ne Explicit Content Allegation : Ki briew kila ioh pdiang ia ka phone call bad la kynnoh ba la pyndonkam lyngba u phone number jongki ban pynsaphriang ia kiei kiei kiba khlemrain. Ki riewsniew kin kam ba kila dep ujor ia ka ejahar pyrshah ia ki bad ki dawa pisa ban pyllait noh ia ka kyrteng ka jongki ban lait na ka jingshah kem.
Ha ki katto katne ki jingjia, ki riewsniew ki leh video call thok ha kaba ki leh kumba dei ki nongbishar ne ki ophisar kiba bat ia ka ain, ha kaba ki ju pyni ia ki kot kiba shu thok bad shukor bad ia ka Non Bailable Warrant of Arrest. Ki byrngem ia ki briew ba kin pynshitom kat kum ka ain bad ki dawa pisa ban lait na ka jingshah kem ne ban mad shuh shuh ia ki jingeh.
Ki briew kila shah pynngop ba ki don hapdeng jong ka jingshah tohkit halor ka jingpyndonkam bakla ia ka pisa, ka jingpyniaid thok ia ka pisa ne ban lait na ka jingsiew iaka khajan ne Tax, ha kaba kila pyni ia ka AADHAR card jong ki briew kiba shah pynngop (ia kaba la pdiang hi da kiba la shah pynngop). Kine ki riewsniew ki pyndonkam ia ki buit ba lada kim lah ban ai iaka jingiatreilang kin shah kem noh mardor.
“La kyntu ia ki paidbah ba kin long kiba husiar haba ki shim ia ka phone call na ki briew kiba kim ithuh bad kim dei satia ban ai ia kino kino ki jingtip shimet ne kiba iadei bad ka Bank ka jongki. Lada don kiba la ai ia ki jingtip halor ki Bank ki jongki, ki lah ban phone mardor ha u 1930 ne ban phah ia ka jingujor ka jong ki ha ka cybercrime.gov.in ne ha ka sancharsaathi.gov.in,” la ong u SP.
