Shillong, K’lyngkot 31 : Ka Sorkar Jylla ha ka sngi Thohdieng, kala pyntip biang ba kala shah ia ki Rangbah Shnong/Dorbar Shnong kiba la rai ban ai jingbit tang ia ki Common Platform ban ialap elekshon ha kane ka elekshon MDC, ka ban long la 21 tarik Rymphang.
Haba pynmih bynrap ia ka hukum ba hynnin ka sngi Palei, ka Deputy Secretary ka Tnad DCA ha ka hukum ba mih hynne ka sngi kala ong “La pynshai biang hangne ba kito ki Rangbah Shnong/Dorbar Shnong kiba la dep rai ban shah tang ia ki Common Platform na ka bynta ka jingialang paidbah ban ialap elekshon jong ki seng sain pyrthei bad ki kyrtong shimet la shah ba kin leh ia kata”.
Kane ka hukum ka dei kaba bynrap ia ka hukum ba hashuwa, kaba bthah ia ki DEO ba kin bthah ia ki Rangbah Shnong/Dorbar Shnong ba ki dei ban shah pynlong ia ki jingialang paidbah jong baroh ki seng sain pyrthei bad kyrtong shimet n aka bynta ka jingpyniaid kaba laitluid bad bym shah liang ia ka elekshon.
Kane ka hukum kala pynpoi biang sha ka jingtakhuh kaba jur hapdeng ka Mawlai Town Dorbar (MTD) bad ka Voice of the People Party (VPP).
Dang khyndiat sngi, ka Mawlai Town Dorbar ha ryngkat ki kyrtong ban iakhun ia ka elekshon na Mawlai kynthup u kyrtong ka VPP, kila shim ia ka rai ban pynlong tang da ki Common Platform ban ialap elekshon ha Mawlai ym shuh ki Jingialang paidbah.
Ia kane ka rai la pynshong nongrim halor ka jingud jingnam jong ki Kmie Kpa, namar ba ki Khun ki Kti jong ki, ki dang don hapdeng ki eksamin bapher bapher jong ka Meghalaya Board of School Education (MBoSE).
Ka VPP kaba la iaid ialap pyrshah ia kane ka rai ka MTD ha kylleng ki jaka, kala ujor sha u Commissioner & Secretary ka Tnad DCA, haba kynnoh ba ka rai jong ki katto katne ki Rangbah Shnong/Sordar Shnong kala pynduh lad ia ka VPP bad ia ki kyrtong jong ka ban pynlong ia ki Jingialang paidbah (public meeting) ban ialap elekshon.
Ia kane ka jingujor la leh da u General Secretary bad MP ka VPP Dr Ricky AJ Syngkon.
